Os socialistas acusan a Xunta de "preocuparse só de falar de España"

O secretario xeral do PSdeG, Manuel "Pachi" Vázquez, acusou a Xunta de Galicia de "preocuparse" só de "falar" de España e ó seu presidente, Alberto Núñez Feijóo, de ser o "peor inimigo" da economía galega. Pola súa banda, o secretario provincial dos socialistas coruñeses, Salvador Fernández Moreda, sostivo que o PP actúa como un "pirómano" co Goberno de España e criticou a folga xeral convocada polos sindicatos.

Na súa intervención ante o comité provincial dos socialistas coruñeses, ó que asistiron máis dun centenar de delegados das agrupacións na provincia, Pachi Vázquez lamentou que, ano e medio logo da chegada de Feijóo a San Caetano, "en Galicia estanse apagando os anos de esplendor e de crecemento".

Como proba diso, esgrimiu que o mandatario autonómico está intentando converter Galicia nunha "gran sede do PP", xa que avanza cara a "unha privatización indiscriminada". "Financiamento público- -privado, si, menos con carácter absoluto nos dereitos básicos dos cidadáns", subliñou, para referirse á educación, as pensións, a sanidade ou a dependencia.

Dito isto, o xefe de filas do PSdeG tamén se mostrou moi crítico coa política informativa da Xunta na loita contra os incendios forestais e denunciou que se ocultaron os mapas dos lumes que se orixinaron no verán.

Na mesma liña, acusou a Consellería de Medio Rural de "abandonar" o camiño da protección dos recursos e, en referencia ó sector lácteo, esixiu a Samuel Juárez "que deixe de botarlles a culpa ós outros", no relativo ó conflito sobre o prezo do leite.

Chamamento á militancia para traballar máis ca nunca

Neste escenario, concluíu que "nin Feijóo nin o PP teñen proxectos" para Galicia, polo que fixo un chamamento á militancia de cara ás eleccións municipais. "É o momento de traballar máis ca nunca", proclamou.

Así, insistiu en que nesta autonomía "o municipalismo é sinónimo de socialismo" e pediulle "inconformismo" á militancia para revalidar a súa presenza nas grandes cidades e obter as deputacións de Pontevedra e Ourense.

Ademais, mostrouse convencido de que o PPdeG non gobernará "nunha soa gran cidade, porque non ten alternativas e porque escolleu o camiño de comprar vontades", en alusión ós diferentes casos de transfuguismo.

De feito, tal e como constatou Vázquez, Feijóo e o presidente do PP nacional, Mariano Rajoy, "hoxe -por onte- en Galicia vanse sentar á beira de tránsfugas", en referencia á festa de inicio do curso político que os populares celebraron en Soutomaior (Pontevedra).

Moito partido por xogar nas municipais do 2011

Na mesma liña fiou a súa intervención Fernández Moreda, quen aproveitou para advertir a militancia de que "hai moito partido que xogar" de cara ós comicios locais do ano próximo. Na mesma idea tamén incidiu o presidente da Executiva Provincial do PSdeG na Coruña e ministro de Xustiza, Francisco Caamaño, quen criticou a política de Feijóo con Galicia. "Se non cre en Galicia, como vai crer en España", preguntouse.

A maiores, o secretario provincial do PSdeG na Coruña, Salvador Fernández Moreda, acusou o PP de actuar como un "pirómano" co Goberno central "para facer máis grandes os problemas" e, sobre a crise económica, defendeu que a solución pasa por "a aplicación das medidas do Goberno".

Así, criticou a convocatoria de folga xeral convocada polos sindicatos para o próximo 29 de se- tembro, por considerala "un erro" e "contraproducente". Moreda insistiu en que "apenas existen alternativas ás medidas do Goberno" e admitiu que a folga só podería "debilitar" o Executivo.

HABERÁ PRIMARIAS?

Apoio a Louro para Pontevedra: "É un candidato excepcional"

"Pachi" Vázquez cualificou o delegado do Goberno en Galicia, Antón Louro, como un "candidato de excepción" para a Alcaldía de Pontevedra, pero precisou que a decisión lle corresponde á militancia. Preguntado sobre as informacións que apuntan a que Louro estaría disposto a encabezar esta candidatura, fronte ó intento da dirección galega de que a tenente de alcalde de Pontevedra, Teresa Casal, repita por terceira vez consecutiva como cabeza de lista, Vázquez afirmou que o actual delegado do Goberno en Galicia "foi sempre un candidato de excepción". "Todos o tivemos na cabeza para Pontevedra", salientou.

No entanto, remarcou que son os militantes "os que teñen que decidir e, se o apoian, a satisfacción de todos os socialistas galegos será inmensa", indicou o máximo responsable dos socialistas galegos, quen definiu a Louro como un home "de calidade contrastada".

En canto á posibilidade de primarias en Vigo para a elección de candidato, Pachi Vázquez asegurou que o actual rexedor, Abel Caballero, "é un alcalde que vai revalidar amplamente os seus resultados" e cualificou de "anécdotas" os problemas xurdidos tras os intentos do ex alcalde Carlos Príncipe de convocar primarias. "Algúns compañeiros deciden, no canto de presentar batalla democrática, librar unha batalla mediática ofrecendo dúbidas sobre un proceso modélico", lamentou.
Fuente: galicia hoxe