PSDG, Coa vista nas urnas: A doutrina un militante un cargo, pendente de aplicar

No Grupo Parlamentario Socialista, prevense numerosos cambios dado o interese mostrado por diferentes deputados de concorrer como candidatos ou de ser incluídos nas listas de cara ás próximas eleccións municipais de maio de 2011 e a directriz imposta por Manuel "Pachi" Vázquez desde a súa chegada á Secretaría Xeral do PSdeG de "un militante, un cargo" para así evitar a acumulación de postos de responsabilidade.

Deste xeito, os parlamentarios que desexen centrarse na actividade política local, deberán ceder os seus escanos no Pazo do Hórreo; situación que xa se viviu, pero á inversa, ó longo do pasado período de sesións, cando a ferrolá Beatriz Sestayo, a lucense Concepción Burgo, o monfortino José Tomé Roca e a vilalbesa Sonia Verdes renunciaron ás súas actas de concelleiros para non incorrer en incompatibilidade.

En todo caso, a inelexibilidade dos deputados autonómicos está "levantando bochas", como apuntan distintas voces socialistas, que critican que os membros do Congreso e do Senado non teñan que dimitir e que ata varios deles expóñanse repetir nos comicios locais, como podería ser o caso de Carmen Marón pola Coruña e de Domingo Tabuyo por Cambados. Esta circunstancia tampouco é do agrado de alcaldes de cidades que desexan incorporar ás súas candidaturas a deputados, tales como o rexedor compostelán, Xosé Sánchez Bugallo, que quere contar co voceiro parlamentario, Xaquín Fernández Leiceaga, como número dous; do vigués, Abel Caballero, que pretende incluír a Abel Losada; e do da Coruña, Javier Losada, que podería contar con Mar Barcón.

Outros socialistas que estudan integrarse nos equipos locais son Modesto Pose, por Vilagarcía de Arousa, praza na que xa goberna o PSdeG; e un dos últimos en ocupar asento no Pazo do Hórreo, Juan Carlos Francisco Rivera, que entrou para substituír a Laura Seara cando esta se fixo cargo do Instituto da Muller e que aspira a arrebatarlle a Alcaldía de Verín a Juan Jiménez Morán (PP).

Neste escenario, no que se prevén movementos de destacados deputados, as mesmas fontes consultadas alertan de que o grupo "pode quedar coxo", polo que apelan á "flexibilidade" da Executiva para evitar este extremo.

Pola súa banda, os nacionalistas serán os únicos que non verán afectado o seu grupo parlamentario polas eleccións municipais, xa que nos primeiros tramos das candidaturas ás locais non aparece ningún nome nos primeiros postos, como é habitual no BNG.
Fuente: galicia hoxe