Silvia Longueira critica que a Xunta obrigue os usuarios ao copago dos servizos de dependencia e atención a domicilio

A concelleira de Servizos Sociais, Silvia Longueira, critica que a Xunta de Galicia obrigue os usuarios dos servizos de dependencia e doutros programas de atención domiciliaria a pagar unha parte do servizo. Silvia Longueira afirma que é lamentable que o Goberno galego non se preocupe polas necesidades reais duns 1.500 coruñeses, na súa maioría pensionistas, que van ter que afrontar o copago dun servizo público co que o Concello contribúe a mellorar a súa calidade de vida e o seu benestar social.

A concelleira de Servizos Sociais explica que a Xunta denegou as peticións do goberno local para que o Concello siga asumindo o copago aos usuarios do servizo de dependencia.

A concelleira engade que o Concello da Coruña foi dos poucos de toda España que asumiu dende o principio a parte que debían pagar os usuarios do programa de dependencia e atención a domicilio. Para iso dedicou cada ano 2 millóns de euros, co fin de lles axudar ás familias coruñesas.

Desta forma, e durante o últimos catro anos, o goberno municipal asumiu o copago, como unha mostra máis do seu compromiso co benestar social dos coruñeses.

Segundo as estimacións da Concellaría de Servizos Sociais, os usuarios do servizo poderían ter que pagar unha media de 80 euros ao mes, aínda que a cantidade varía en función do nivel de ingresos de cada usuario e do número de horas de atención a domicilio. Por iso, os usuarios con rendas moi baixas poderían quedar exentos do copago.

Compromiso social e co benestar

A concelleira de Servizos Sociais, Silvia Longueira, destaca que A Coruña é recoñecida en toda Galicia como a cidade que mellor simboliza o seu compromiso social, cos programas de benestar e solidariedade. Este compromiso ineludible e firme do goberno municipal tradúcese nun investimento de 7 millóns de euros e diferentes programas que permiten atender cada día a máis 3.000 persoas maiores de 65 anos.

Este é o compromiso social do goberno municipal, dos 20 técnicos que traballan nestes servizos e dos 250 traballadores das empresas contratadas para prestar estes servizos, así como de entidades colaboradoras como Cruz Vermella e outras. Trátase dunha aposta municipal que ten o seu referendo nos orzamentos de 2010 e no que ata un 35 por cento deste destínase a políticas de benestar e gasto social.

Ademais, é un forte investimento para programas como axuda a domicilio, comida a domicilio, reparacións a domicilio, teleasistencia, Servizo Municipal de Urxencia, Programa de Urxencia Social (que permite dar axudas directas de 240 euros ao mes a persoas cunha urxencia ou de 1.000 euros ao ano nunha soa axuda para facer fronte ao pago do aluguer, unha factura médica ou calquera outra urxencia social) e o cheque comedor para que as persoas maiores poidan comer en establecementos de hostalería dos seus barrios a través de axudas do Concello, así como o propio comedor social do centro cívico de Monte Alto.

Dende a Concellaría de Servizos Sociais destácase que ningunha cidade conta cunha rede social tan ampla e completa na que se presta atención social, na que os programas sociais teñen especial protagonismo e onde traballa un importante número de asistentes sociais que dan cobertura ás persoas necesitadas no seu propio barrio. Ademais, hai un compromiso social coas entidades sociais e benéficas que realizan un gran labor e coas que o goberno municipal mantén unha estreita colaboración: máis de 100 convenios son os que o Concello ten subscritos con outras tantas entidades de distinta índole e que se renovan anualmente.