6-N: galego, pero pouco

O Papa Benedito XVI usará o galego, e ademais de dirixirse ós fieis na lingua de Castelao, empregaraa previsiblemente nunha lectura e nunha petición durante a Eucaristía que se celebrará no Obradoiro. Non obstante, o catalán "gañará por goleada" en Barcelona, posto que o Pontífice ten previsto empregalo durante toda a primeira parte da misa de consagración da Sagrada Familia. Non só a celebración que vai ter lugar na Casa del Niño Dios de Barcelona, dedicada ós mozos con eivas físicas e psíquicas será en catalán, senón que, ademais, a eucaristía principal, a que o Papa vai presidir no templo de Gaudí, tamén se centrará na lingua de Cataluña.

Máis en concreto, o catalán estará presente desde o inicio da celebración, co canto de entrada e o saúdo. Tamén serán nese idioma as dúas lecturas da misa, así como o salmo responsorial.

Esta presenza na liturxia papal en Barcelona contrasta abertamente coa mínima representación do galego nas cerimonias que o Papa peregrino vai celebrar en Santiago, porque serán sobre todo en castelán e latín.

Cuestións lingüísticas á parte, a súa visita a Santiago xa toma forma e onte presentouna o Arcebispado nun encontro coa prensa para deseñar a cobertura mediática. Do percorrido destaca o protagonismo que adquirirán tres mil escolares de cole­xios relixiosos e públicos de Galicia, que recibirán na zona das Cancelas ó Papa, dentro da ruta que o Sumo Pontífice realizará desde o aeropor­to de Lavacolla ata a Ca­tedral, de acce­so libre para todas as persoas que desexen ver o Santo Padre, aínda que o Arcebispa­do interará distribuír os fieis por dioceses, como se aprecia no gráfico adxunto. A vella estrada da La­vacolla, pola que transi­tará o Papamóbil, estará totalmente pechada ó trá­fico e valada. O automóbil papal circulará, ademais, a unha velocidade "moi reduci­da" para que todos os fieis o poidan ver e saudar e, pola súa vez, Benedito XVI poida ver como se decorou to­da a vía. O Papa aterrará na Lavacolla ás 11.30, e unha hora despois comezará o seu percorrido en Papamóvil. Calcúlase que á unha da tarde entre na Catedral. Abrazará o Apóstolo, rezará e ás 16.30 horas dará unha Misa no Obradoiro.

Ademais, o voceiro da Santa Sede no Vaticano, Federico Lombardi, confirmou onte que o Santo Padre saudará ó líder do PP, Mariano Rajoy, despois da misa compostelá e reunirase co presidente do Goberno en Barcelona.

Os Príncipes de Asturias recibirano no aeroporto

Por outra banda, o padre Federico Lombardi destacou que o Papa será recibido polos Príncipes de Asturias e algúns representantes do Goberno central e as autoridades autonómicas no aeroporto da Lavacolla. Concretamente, fontes oficiais informaron que o vicepresidente do Goberno, Alfredo Pérez Rubalcaba, recibirá o Pontífice, aínda que en principio estaba previsto que a ex vicepresidenta primeira do Goberno fose a encargada.

Na roda de prensa posterior ó Consello de Ministros, Rubalcaba confirmou a súa presenza cando lle preguntaron por quen substituiría a De la Vega. "O vicepresidente primeiro, que substituíu á vicepresidenta primeira", dixo, á vez que recordou que o "día a día" das relacións coa Igrexa asumirao o ministro de Presidencia, Ramón Jáuregui. Así mesmo, fontes ministeriais confirmaron a presenza na cidade galega do titular de Xustiza, o galego Francisco Caamaño, a cuxa carteira corresponden as relacións coas confesións.

PATROCINADO POR CULTURA
Limparase a fachada da Catedral

O conselleiro de Cultura, Roberto Varela, anunciou onte que a Xunta acometerá a limpeza da fachada norte da Catedral de Santiago, que dá á praza da Acibechería, con motivo da visita do Papa Benedito XVI prevista para o próximo 6 de novembro.

Varela, que visitou o templo acompañado polo arcebispo de Santiago, Julián Barrio, e polo deán José María Díaz, para inspeccionar os resultados dos traballos de restauración nas bóvedas da nave central e o transepto, apuntou que esta limpeza forma parte dunha serie de traballos previstos a curto prazo cun investimento superior ós 750.000 euros. Ademais da limpeza, os labores previstos inclúen outras pequenas intervencións na fachada norte.

Mellor avisar por e-mail

O Arcebispado está inten­tando facer esta distribu­ción para facilitar o acceso, polo que lles reclamou ós grupos de persoas que pensen en vir que o co­muniquen en: acogida@bene­dictoxviensantiago.es.

Desde as 08.00, aberta a praza

Os fieis que o día 6 de novembro desexen asistir á misa que o Papa ofrecerá no Obradoiro poderán acceder libremente a ela desde as 8.00 horas da mañá, tras pasar dous cordóns de seguridade.

Cortarase a N-634 ás 10.00 h

A Garda Civil restrinxirá o tráfico da estrada N-634 entre Lavacolla e Santiago a partir das 9.00 horas do día 6, cando só poderán circular residentes. A partir das 10.00 horas o tráfico quedará totalmente cortado.
Fuente: Galicia hoxe