Alixeirar os botiquíns

Co maior gasto por receita do Estado, un plan de aforro sanitario en Galicia máis que proposta aspira a ser urxencia. Pílulas para colesterol, para a depresión, analxésicos e hipertensivos concentran o maior volume de prescricións financiadas pola sanidade pública galega, que destina actualmente un de cada tres euros do seu orzamento global (1.300 millóns de euros ao ano), a subvencionar medicamentos.

É neste contexto no que xorde o plan de aforro que tramita o Parlamento galego, co apoio de PPdeG e BNG, e co que a Xunta pretende aforrar cen millóns de euros subvencionando só o composto de menor prezo por cada principio activo. Nun só mes, as arcas contarían con 9 millóns de euros máis, orzamento suficiente, por exemplo, para construír tres centros de saúde. De saír adiante a proposición de lei, presentada polos populares e que os socialistas galegos tildan de "inconstitucional", Galicia sería a primeira comunidade do estado en contar cun catálogo propio e reducido respecto ao que mantén en vigor o Sistema Nacional de Saúde (SNS).

Diferenzas de máis de 30 euros cos fármacos xenéricos

O proxecto que tramita o Parlamento sumaríase á campaña de promoción de uso de xenéricos que puxo en marcha a consellería de Sanidade, que lidera Pilar Farjas. As diferenzas de prezo entre uns e outros poden ser considerables.

Unha caixa de 28 comprimidos de 20 mg de Zarator -un fármaco contra o colesterol- custa 45,74 euros fronte aos 9,41 euros do xenérico denominado Apotex.

Entre os analxésicos tamén hai importantes distancias no prezo: o Ibuprofeno Arginina Acost de 600 mg e 40 sobres pódese adquirir por 4,14 euros, pero se o médico receita Dolorac -que ten a mesma composición- a factura elévase ata os 13,25 euros.

Pero a día de hoxe Galicia segue sendo unha das comunidades peor posicionadas en canto ao consumo de xenéricos, fármacos exactamente iguais e que simplemente ven rebaixado o seu prezo ao caducar a patente que ostentan as far­macéuticas que os producen. En agosto de 2010, supuxeron o 15,5% do total das receitas que dispensaron os médicos galegos. A cifra é algo máis alta que a do ano anterior, 11,08%, e que a do 2008, 9,79%. Con todo, queda moi lonxe do 25-30% de media estatal.

O gasto por receita é outro dos indicadores no que sae mal parada a sanidade galega. Segundo os datos do Ministerio de Sanidade deste mes de xullo, a comunidade mantén un prezo medio de 13,97 euros, o máis alto de España, cuxa media rolda os 12,50 euros, aínda que hai autonomías como a andaluza que conseguiron rebaixar as súas facturas ata os 11,08 euros. Con todo, Galicia logrou reducir un 4,74 por cento o prezo medio das súas receitas en xullo en comparación co mesmo mes do 2009, pero no resto de España conseguiuse unha baixada máis importante: un 8,11%.

O Sergas gastou en xullo 76 millóns en medicamentos

No último ano, Galicia tamén logrou conter o seu gasto farmacéutico mensual. Segundo os datos remitidos polas comunidades autónomas á Dirección Xeral de Farmacia e Produtos Sanitarios do Ministerio de Sanidade e Política Social, o pasado mes de xullo a factura que o Sergas lles pagaba ás farmacéuticas ascendía a 75,9 millóns de euros, un 5,96 por cento menos que no mesmo mes do ano anterior cando alcanzou os 80,7 millóns de euros. A tónica foi xeneralizada en todas as comunidades xa que a única autonomía que aumentou o seu gasto farmacéutico foi Castela e León, cun 10,58 por cento máis que en xullo do ano anterior.

"Non podemos esquecer tampouco o custo hospitalario"

"A solución ao gasto farmacéutico non pasa polos xenéricos. Pode axudar, pero cando un xenérico chega ó mercado o mesmo produto de marca inicia unha baixada progresiva de prezo e ao cabo dun tempo equipárao, na práctica, co do xenérico", sinala Manuel Vázquez Pérez, titular dunha farmacia en Monforte (Lugo). Vázquez recoñece que, desde hai case un ano, aumentou o número de prescricións de xenéricos, "no noso caso case se duplicaron", asegura. Sobre a posible redución do catálogo considera que "mentres se manteñan os principios activos necesarios, non debería haber problemas", estima, e recorda que, á hora de falar de gasto sanitario e controis, "non debemos esquecer o hospitalario, xa que parece que os malos somos sempre as farmacias", sentenciou.

Os médicos, encantados e a patronal vese discriminada

O plan de aforro gusta nos colexios médicos, pero levantou as críticas da patronal das farmacéuticas. Os primeiros consideran que é unha medida necesaria para garantir a sustentabilidade da sanidade pú­blica mentres que os segundos alertan da "discriminación á que se condenará ós galegos" se finalmente se aproba o catá­logo reducido.

"Apoiamos o documento que presentou o PPdeG no Parlamento", explica Luciano Vidán, presidente do Colexio Oficial de Médicos da Coruña, que cre que unha medida así habería que tomala aínda que non estive­semos atravesando unha crise económica, pero considera que actualmente se fai imprescin­dible. "Nun momento en que se cuestiona a sustentabilidade do sistema, hai que tomar decisioóns como esta antes de que haxa que falar de copago ou de redu­cir prestacións", subliña.

Pola contra, a patronal da industria farmacéutica española Farmain­dustria amosábase onte preocupada polo futuro catálogo. "Trátase dunha iniciativa dis­criminatoria para os cidadáns galegos, que atenta contra a equidade dos pacientes no acceso aos tratamentos disponibles e contra o seu dereito de acceder aos medicamentos en condicións de igualdade respecto de cidadáns doutras comunidades", afirma a patronal farmacéutica. Respecto diso, argumenta que a proposición de lei non establece medidas para promover alternativas terapéuticas menos custosas, senón que "exclúe sen máis determinados medicamen­tose, rompendo o principio de equidade no acceso ás prestacións sanitarias básicas". A patronal fai seus tamén os argumentos do Ministerio de Sanidade, que xa expresou as súas dúbidas sobre a legalidade. A Lei de Cohesión e Calidade do Sistema Nacional de Saúde do 2003, lembra, prevé un catálogo básico común de prestacións para toda España, que as autonomías poden ampliar, pero non reducir.
O presidente da Xunta, Alberto Núñez Feijóo, afirma defender os intereses dos galegos e non das "industrias e laboratorios" a diferenza do que fan os socialistas. "Imos blindar o sistema sanitario público e racionalizar o gasto", aseverou.

O líder do PSdeG, Pachi Vázquez, denunciou que "van romper a caixa única do sistema farmacéutico reducindo o catá­logo de medicamentos", denunciou, e insistiu en que os galegos terán menos fármacos que no resto de España.
Fuente: Galicia hoxe /L. CAMINO/ I. PALMEIRA