Caixas e sindicatos acaban as negociacións do acordo laboral

As caixas, CC.OO. e Csica continuaron durante a xornada de onte os traballos para pechar a redacción dun preacordo laboral para a fusión de Caixa Galicia e Caixanova e deron por rematadas as negociacións.

A súa saída da reunión da mañá co resto de sindicatos e directivos das entidades, representantes de Csica e CC.OO. sinalaron que confiaban en pechar "canto antes" o texto, posiblemente na mesma tarde de onte, algo que se prevé que acontecería, aínda que á hora de peche deste periódico non había máis novidades. Pola súa banda, a CIG que ata agora se mantiña nunha plataforma conxunta con estas dúas organizacións, anunciaba que analizará o documento presentado polas caixas onte para decidir se se adhire ou non ao pacto.

Deste modo, as organizacións maioritarias entre os traballadores (CC.OO e Csica representan o 64 por cento do equipo na nova caixa) buscaban redactar o preacordo completo onte pola tarde. "Todos os vimbios están postos para o cesto, simplemente hai que confeccionalo. Non hai ningún problema máis", afirmabao representante de Csica, Juan Quicler.

O voceiro de CC.OO., Luis Mariño, sinalou que o documento "matriz" está listo e que esperaba "poder rematalo" nas vindeiras horas. Dende o xoves da semana pasada, indicou, o texto sufriu "modificacións importantes", en relación con "aspectos sociais". Polo demais, afirmou que se mantén a vía do expediente de regulación de emprego para tramitar as prexubilacions, co 85% do salario. Non obstante, está por definir qué cantidade se toma en concreto para calcular ese 85%.

Juan Quicler expuxo que os equipos das organizacións sindicais revisaban onte os acordos e continuarán os traballos para rematar "rápido". "Non sabemos se remataremos hoxe -por onte- ás 24.00 horas ou mañá -por hoxe- ás 16.00 horas", dixo. En calquera caso, defendeu que se trata dun "dos mellores acordos con respecto ao que se asinou en España ata agora". "Pero non é un acordo que nos poida amolar, por suposto que non o é", reafirmou.

Pola súa banda, o representante da CIG, Clodomiro Montero, indicou que a unidade sindical non se mantiña onte ó mediodía e explicou que a CIG analizaba o documento das caixas para decidir se o subscribía ou non. Explicou que non se recollían algunhas das "garantías" que reclamaba esta organización nin se garantía que non se vaian a externalizar servizos ou a trasladar carga de traballo a Madrid e queixouse de formas da negociación.

"Non había nada asinado, só cousas faladas, e parece que o falado o levou o vento", afirmou. En calquera caso, indicou que calquera pacto deberá ser sometido ás asembleas de traballadores.

A OUTRA VISIÓN

O voceiro de UGT, José Ramón de Pliego-Valdés, manifestou que a súa postura continúa sendo a de non apoiar o acordo laboral e criticou que "algunha organización sindical" aprobe que se vendan oficinas "co persoal dentro", pois o texto, segundo esta organización, indica que se deben garantir os postos de traballo, pero non necesariamente dentro da nova caixa. "A redacción, tal e como está, prexudica notablemente a moita xente", concluíu
Fuente: Galicia hoxe