Carbón: Todos ó Supremo

Con todas as súas forzas, Galicia rexeita o decreto do carbón. Nos municipios afectados multiplícanse as mobilizacións, como a celebrada onte nas Pontes entre dolorosos berros de protesta. E tanto as administracións como as empresas botarán man da xustiza. As principais compañías eléctricas xa recorreron onte o decreto ante o Tribunal Supremo, de forma unilateral. Endesa, Iberdrola e Gas Natural Fenosa piden medidas cautelares para que non se aplique, "xa que a súa tramitación eludiu o Consello de Estado". E tamén a Xunta de Galicia solicita ditas medidas cautelares, nun recurso ante o Supremo e o Tribunal de Luxemburgo.

O Goberno central quere incentivar a partir de mediados deste mes o consumo de carbón nacional na produción eléctrica. "Isto suporá desmantelar as centrais das Pontes e Meirama, nunha decisión sectaria", lamentou o presidente da Xunta, Alberto Núñez Feijóo. As eléctricas recorren o decreto porque o uso do carbón autóctono desprazaría outras tecnoloxías, como os ciclos combinados de gas. Cando se publicou en febreiro a versión anterior da normativa, as compañías xa presentaran senllos recursos con petición de medidas cautelares. Segundo o sector, a norma vulneraría a lei ó marxinar a outras tecnoloxías na xeración eléctrica. A CIG tamén recorrerá esta medida enerxética ante o Supremo, reclamando a súa suspensión cautelar. Calcula que o decreto tería "un grave impacto tanto nas Pontes e Cerceda como no resto de Galicia". O sindicato nacionalista solicitou unha entrevista co ministro de Industria: "Se non contesta en 12 días, incrementaremos a presión social".

"A razón está con nós", o lema da concentración

Nas Pontes, crece paulatinamente a indignación. Os veciños secundaron onte unha gran manifestación, convocada polo Goberno local e coincidindo co fin do peche no Concello. Centos de camioneiros colapsaron as rúas, acompañados por veciños e alcaldes da comarca. Carteis contra o decreto e sonoras pitadas serviron para manifestar que "todos somos As Pontes". A mobilización rodeou a contorna da térmica, ao mesmo tempo que os alcaldes das Pontes e Cerceda reuníanse co secretario de Estado de Enerxía. Pedro Marín trasladoulles a mensaxe do Goberno central: "As axudas non prexudicarán ás centrais galegas".

"Loitaremos todos xuntos o tempo que sexa necesario, non permitiremos que ninguén nos menosprece", berraron onte veciños, empresarios, transportes e alcaldes na manifestación. Mentres os rexedores das Pontes e Cerceda buscaban saídas ó conflito en Madrid, a antiga vila mineira converteuse nunha soa voz. Os manifestantes rodearon a praza do Carmen, mentres se sucedían os discursos dos representantes do Goberno das Pontes e dos alcaldes das Somozas, Ortigueira ou Ferrol. Á marcha tamén acudiron os presidentes da Deputación Provincial e da Autoridade Portuaria de Ferrol, voceiros da Cámara de Comercio, e alcaldes doutras vilas da comarca como o da Capela, Cabanas ou Pontedeume. "A razón está con nós é a hora de estar todos unidos", berraron a unha voz.

OS ALCALDES ACODEN A MADRID O Goberno non tomará medidas compensatorias ata o ano que vén

Os alcaldes das Pontes e de Cerceda acudiron onte a Madrid para reclamar garantías de funcionamento das centrais térmicas galegas e medidas que eviten a destrución de emprego que se pode rexistrar nas industrias auxiliares, de mantemento, de hostalaría, e no sector do transporte de carbón, se se paraliza a actividade das centrais térmicas.

O rexedor de Cerceda, o socialista José García Liñares, explicou que o Goberno central esperará ata 2011 para decidir se pon en marcha medidas que compensen os efectos negativos do decreto do carbón. García Liñares manifestou manter unha conversación telefónica na noite de onte co vicepresidente primeiro do Goberno, María Teresa Fernández de la Vega. Na conversa telefónica, De la Vega comprometeuse, segundo as afirmación do alcalde de Cerceda, que unha vez que se aplique a nova norma o Goberno realizará un seguimento para determinar o impacto real nas bisbarras afectadas, aínda que as decisións non se adoptarán antes do 31 de decembro. "A conversación foi longa, e anunciou que van facer un seguimento e ver os efectos do decreto, o que non teño claro é como se corrixe ese impacto a partir do 31 de decembro", manifestou.

Pola súa banda, a Xunta de Galicia pedirá que se apliquen medidas preventivas no recurso que presentará ante o Tribunal de Luxemburgo polo decreto. segundo asegurou o director xeral de Industria, Ángel Bernardo Tahoces. Ademais, o responsable de Industria reiterou en Ferrol as críticas ao Goberno central por non atender ás reivindicacións da Xunta e resaltou que o Goberno autonómico "non foi invitado" á reunión que en Madrid dos alcaldes de As Pontes e de Cerceda co secretario de Estado da Enerxía.

Manifestación, hoxe ás sete

As Pontes acollerá hoxe, a partir das 19.00 horas, unha nova concentración para rexeitar o decreto do carbón. A protesta foi convocada pola Plataforma contra o decreto, integrado polos sindicatos CIG e USTG, o BNG, o Concello de San Sadurniño e o colectivo de transportistas, que esixen mudar todo o texto.

A dez días da fin da actividade

Dez poden ser os días que faltan para que teña lugar o cesamento da actividade nas térmicas das Pontes e Cerceda. Segundo os sindicatos, o apagamento podería estar próximo, poñendo en risco numerosos postos de traballo directos e indirectos nas comarcas afectadas. De feito, a CIG manifestou onte que "xa se fala de ERE".
Fuente: galicia hoxe