PSOE afirma que Galicia ten o peor presidente e o peor goberno de toda a súa historia e acusa a Feijóo de machacar os dereitos sociais e a lingua

Pachi Vázquez advirte que esta dereita non é a de sempre, é a ultradereita, a máis radical, fría e despiadada, á que lle da igual que os nenos teñan libros ou comedores".

O secretario Xeral do PSdeG, Pachi Vázquez, afirmou hoxe que Feijóo "é o garante da corrupción, o transfuguismo e o enchufismo" e non o garante da ética como dixo ao chegar á Xunta, polo que avogou por "traballar para cambiar un goberno que "o único que fai é recortar servizos públicos, paralizar e fomentar prácticas totalmente contrarias á ética que tanto nos venderon".

Na súa intervención na romaría organizada polos socialistas de Compostela xunto ao alcalde de Santiago, Xosé Sánchez Bugallo, e o viceportavoz do PSOE, Xosé Blanco, Vázquez salientou como evidencias da falla de ética de Feijóo os casos de transfuguismo e da autovía de Carballo.

No caso da autovía, lembrou que a Xunta desbotou o proxecto realizado polo anterior Executivo para presentar logo outro máis caro, e tentou licitalo a unha empresa que presentaba unha oferta 200 millóns de euros máis cara que a anterior. "Cando os pillamos cas mans na masa, decidiron anular outra vez o proxecto e volver a licitar, e ao final Carballo vai quedar sen autovía", augurou.

Por elo amosou o convencemento de que "Galicia ten o peor goberno e o peor presidente da súa historia democrática, porque Feijóo o único que fai é recortar servizos públicos, paralizar proxectos e fomentar as prácticas totalmente contrarias á ética que tanto vendeu ao chegar á Xunta".

"Feijóo dixo que ía ser o garante da ética, pero converteuse no garante da corrupción, o transfuguismo e o enchufismo neste país", sentenciou, "só fai falla preguntar en Mos, Gondomar e Silleda, ou mirar o que pasa coas deputacións provinciais en Ourense e Pontevedra".

Animou por elo aos militantes e simpatizantes socialistas a traballar "para cambiar este goberno" porque cando un presidente machaca a lingua, o ensino público, a sanidade, non hai que cambiar o decreto ou aos conselleiros, hai que cambiar ao goberno", argumentou.

Fíxolles un chamamento a "ir porta por porta" para explicar o proxecto socialista nas eleccións municipais e para dicirlle aos cidadáns "que esta dereita non é a de sempre, é a ultradereita, a máis radical, fría e despiadada, á que lle da igual que os nenos teñan libros ou comedores ou que os enfermos teñan que esperar cada vez máis por un quirófano". "Esta é a dereita máis perigosa - dixo en alusión ao PP liderado por Feijóo- porque tras a cara sonriente e o 'bo rollo' hai un goberno que está a atacar os nosos dereitos sociais".

"O PP non ten cartas para gañar esta partida", afirmou Vázquez, "e non a gañarán se os socialistas xogamos as nosas cartas, que son as da autoestima, as ganas de cambiar o país e o noso traballo".

Tanto Vázquez como Bugallo e Blanco contrapuxeron o "importante esforzo inversor do Goberno de Zapatero en Galicia" coa paralización e nula xestión do Goberno de Feijóo. Así, Bugallo destacou a importancia dos plans E e FEIL para os concellos, e Blanco lembrou que o Ministerio de Fomento do último executivo do PP, en 2003, destinoulle 413 millóns de euros á nosa comunidade, mentres o investimento do pasado ano fo ide 1.500 millóns de euros "ao igual que o de este ano e o do ano que ven".

Blanco fixo alusión á presencia de Rajoy hoxe en Santiago "onde veu a un acto na igrexa, como acostuma. Primeiro veu a abrazarse ao Apóstol, e dentro de pouco irá a Lourdes, porque só un milagre pode facer que gane as eleccións", ironizou. Engadiu que Rajoy "leva de folga varios anos, porque non presentou nin unha soa proposta para saír da crise, mentres o Goberno socialista triplicou en seis anos os investimentos en Galicia con respecto aos feitos polo PP".

Respecto ao Goberno de Feijóo criticou "que vivan de queixarse" e de "tentar poñer atrancos" mentres o Goberno socialista vai facer "a maior licitación da historia en Galicia" para garantir o AVE en 2015, como está comprometido, para "non permitir que Galicia perda o tren do futuro", sentenciou.

A este respecto, anunciou os proxectos do Ministerio de Fomento de aquí a abril de 2011 en Galicia, entre os que destacou a nova terminal do aeroporto de Lavacolla, a primeira pedra da nova terminal de Peinador e da ampliación de Alvedro, as obras da AP-9, o inicio da ampliación da Ponte de Rande.

Engadiu a apertura de novos tramos da Autovía do Cantábrico, a contratación nun só paquete as actuacións pendentes para a chegada do AVE, a licitación da alternativa A-59 e A-57, a sinatura do convenio da alta velocidade de Ourense, da estación intermodal da Coruña e a licitación do concurso da estación de alta velocidade de Lugo, "para que o vindeiro ano os galegos poidan circular xa no primeiro tren de alta velocidade nesta comunidade".
Fuente: Xornal de Galicia