Último OK á fusión

As asembleas de Caixa Galicia e Caixanova danlle o "si" definitivo a unha alianza que custará 675 millóns ·· Recibiu 273 votos a favor, 8 en contra e 4 abstencións.

A historia financeira de Galicia acaba de dar un novo paso: anteriores movementos iniciados en 1944 deixaran dúas grandes caixas de aforros e onte as súas asembleas votaban si para unirse nunha soa, a Caixa de Aforros de Galicia, Vigo, Ourense e Pontevedra. Unha integración que, segundo se detallou onte ós conselleiros xerais, custará ao redor de 675 millóns de euros -intereses do Fondo de Reestruturación Ordenada Bancaria incluídos-, pero que será ben soportada grazas a unha potencial redución de custos e sinerxías de 1.012 millóns de euros. O estimado superaría os 337 millóns. En ambos os dous cumios, un na Coruña, o outro en Vigo, asistiron 285 dos 320 membros (o 89%), que sumaron 273 votos a favor, fronte a só 8 en contra. As abstencións limitáronse a catro.

Concluídas as asembleas, o presidente de Caixa Galicia, Mauro Varela, cualificou de "fito histórico" para esta comunidade a ratificación do proceso de fusión das caixas galegas. O copresidente da nova caixa galega manifestou a súa "satisfacción absoluta" polo seu resultado e considerou "esmagante" o apoio a este proceso. Ó preguntarlle sobre a ausencia do ex director xeral de Caixa Galicia e presidente da fundación da futura caixa, José Luis Méndez, á asemblea, Varela argumentou que "tiña algunha outra cousa que facer", aínda que matizou tamén que "non tiña por que estar obrigatoriamente".

Firme compromiso coas empresas galegas

Por outra banda, o presidente de Caixa Galicia subliñou que a fusión con Caixanova será "a solución de moitos problemas", indicou ao referirse á necesidade de "axudas" ás empresas galegas. Así, insistiu en que a nova caixa manterá unha "posición próxima" a este sector "como xa tiñan as dúas caixas", precisou, ao tempo que rexeitou que os desinvestimentos previstos vaian ter consecuencias no tecido empresarial galego. "As empresas non van quedar desgornecidas en absoluto", remarcou Varela, quen explicou que as dúas caixas empezarán agora "a estudar" como se producirán eses desinvestimentos, aínda que evitou concretar prazos. "É complicado dar unha data", admitiu o presidente de Caixa Galicia.

A asemblea xeral extraordinaria de Caixanova, pola súa banda, aprobou a fusión nunha reunión que se prolongou máis de dúas horas e media e na que se produciron cinco votos en contra (de CIG, UGT e o representante de Cangas) e catro abstencións dos membros do BNG. Á cita acudiron 148 dos 160 conselleiros xerais da caixa, que avalaron a unión con Caixa Galicia. En contra votaron as dúas organizacións sindicais que non asinaron o pacto laboral (os tres representantes de UGT e un da CIG) e o nomeado polo Concello de Cangas (Pontevedra), Xosé Manuel Pazos, que forma parte da Agrupación Canguesa de Esquerdas (ACE).

Pola súa banda, os representantes do BNG, que son catro, abstivéronse na asemblea de Caixanova, aínda que non o fixeron na de Caixa Galicia, que tamén deu luz verde á fusión. No caso da caixa con sede na Coruña, rexistráronse tres votos en contra, os de CIG. Tanto nunha reunión coma na outra, sindicalistas de CIG, UGT e CGT concentráronse para manifestar o seu desacordo co pacto laboral asinado entre as caixas, CCOO e Csica.

Rexeitamento de CIG, UXT e CGT ó pacto laboral

Mentres, un cento de representantes sindicais de CIG, UXT e CGT concentráronse ante as sedes da Fundación Caixa Galicia e o centro social de Caixanova, como mostra de rexeitamento ao pacto laboral asinado no marco da integración de ambas as dúas entidades. Na Coruña, a concentración, na que se reú-nen en torno a 50 persoas, comezou media hora antes do inicio da asemblea en primeira convocatoria, que se fixou para as 18.00 horas. Os delegados da CIG manifestáronse coa súa propia pancarta, co lema Non ao desmantelamento, venda e privatización de Caixa Galicia, e dos de UGT e CGT por outro, co slogan Pacto laboral fusión. Así non.

Pola súa banda, no edificio no que se reuniron os conselleiros de Caixanova na cidade olívica, concéntranse outros cincuenta representantes de CIG e UGT de forma conxunta e con pancartas nas que aluden ao devandito pacto laboral e nas que denuncian o "desmantelamento, venda e privatización" da caixa de Vigo.

Goberno e oposición, da man: "Galicia fixo historia"

Nin desde as propias entidades implicadas, nin desde as forzas políticas galegas, nin desde os sindicatos (CIG, UXT e CXT aínda seguían protestando onte), a negociación para integrar a Caixa Galicia e Caixanova nunha única financeira galega "forte e solvente" non foi tarefa fácil". Houbo desencontros para todos os gustos, pero agora que ambas as asembleas deron xa o si quero definitivo, hai algo no que todos coinciden: Galicia fixo onte historia.

Ata o presidente Feijóo e o líder socialista Pachi Vázquez están, por unha vez, de acordo nesta afirmación. "Espero e desexo que hoxe se poida culminar un momento histórico, non só desde o punto de vista financeiro, senón para un pobo que está vendo un horizonte de unidade e cooperación, fronte á competencia, o localismo e a división", dicía onte o xefe do Executivo autonómico momentos antes de que empezasen as asembleas. Pola súa banda, o secretario xeral dos socialistas, Manuel Vázquez, subliñou que, nun prazo de tres anos, Galicia terá "unha gran caixa" que contará "sempre" co "apoio, a colaboración e a participación" do socialismo galego. Vázquez gabou, ademais, o esforzo realizado por sacar o proceso adiante.
Fuente: Galicia hoxe