A Coruña combaterá a crise en 2011 co Orzamento Municipal máis alto da historia, o máis investidor e o máis social

A tenente de alcalde de Facenda, Carmen Marón, anunciou que o próximo ano "os coruñeses combateremos a crise co Orzamento máis alto da historia; co Orzamento Investidor máis alto da historia, e co Orzamento Social máis alto da historia".

Trátase do Orzamento Municipal máis alto da historia, pois se pasa dos 210,7 millóns de euros de 2010 aos 256,7 millóns de euros de 2011, o que supón un incremento do 21,8 por cento. O Orzamento Consolidado, que inclúe as contas do IMCE, Emalcsa e Emvsa, supón chegar aos 277,1 millóns de euros.

Trátase, tamén, do Orzamento Investidor máis alto da historia porque a cidade disporá de 60,6 millóns de euros para investir ao longo e ancho da cidade, cun incremento que alcanza o 150% (o investimento municipal propia en 2010 foi de 27,4 millóns, chegando a 53,4 millóns co Feil).

E é o Orzamento Social máis alto da historia, porque como nunca se impulsan os programas de protección social, os programas de promoción de emprego e os programas educativos e de benestar.

Por tanto, Carmen Marón afirmou con satisfacción que a Xunta de Goberno aprobou o Orzamento Municipal para 2011 e desta forma "damos o primeiro paso, un gran paso, para afrontar con garantías o próximo ano e pór en marcha proxectos de futuro para esta década".

Un presuposto xerador de actividade económica

É o orzamento máis alto, o máis investidor e o máis social, a pesar de que por segundo ano consecutivo conxélanse os impostos e séguese a liña de reducindo da débeda. En definitiva, un orzamento que combate a conxuntura económica con argumentos sólidos:

1-Porque o orzamento, 256,7 millóns de euros, supón en si mesmo un forte impulso á actividade económica da cidade. Poucas empresas garanten unha actividade económica deste nivel. Por tanto, o impacto económico que representa 256,7 millóns de euros é innegable polo investimento e polos contratos con empresas concesionarias de servizos. Todo iso redunda en obras, en actividade empresarial, en xeración de emprego.

2-Tamén cun planificado programa investidor, que segue a liña dos últimos anos e que recibe un forte impulso para 2011. Un programa investidor que non se desvía do camiño iniciado fai tres anos: unha revolución urbana sen precedentes na historia da cidade, que segue avanzando con novas obras de renovación e modernización das rúas, chegando a todos os barrios. Obras que a cidade necesitaba, obras que pon en valor as rúas, obras que reforzan o espírito de barrio.

Así, recóllense importantes investimentos para continuar o plan de modernización da cidade, con máis de 1 millón de euros; o plan de modernización de Mariñeiros e Agra do Orzán, con preto de 1 millón; a renovación da rúa de San Andrés, con 400.000 euros; o novo lousado do Paseo Marítimo, con 600.000 euros; a posta en marcha do centro cívico cultural Ágora, a súa biblioteca, o teatro, con 1,2 millóns de euros, e a escola infantil de Pedralonga, con 500.000 euros, entre outros proxectos que chegan a todos os cidadáns e a todos os barrios. Ademais, inclúese unha primeira partida para a Estación Intermodal.

O proxecto estrela do orzamento é o Parque Ofimático, cun investimento de 46 millóns de euros para os traballos de urbanización sobre unha superficie de 394.000 metros cadrados, no que será o novo ensanche urbano da cidade. O maior desenvolvemento urbano da década: con 2.000 vivendas, a metade de protección oficial; con 68.000 metros cadrados dedicados a parques, xardíns e prazas, máis que todo o parque de Oza. Un novo barrio para vivir, para unha cidade con futuro.

3-E cun completo programa de protección social, que se segue impulsando, que en 2011 mesmo se verá reforzado con novos plans e que sobre todo se potenciará con maior financiamento. Máis benestar social, máis educación, máis cultura, máis solidariedade, máis e mellores servizos públicos municipais.

"Para este goberno o máis importantes son as persoas. É nosa maior preocupación e por iso prestamos especial atención ás necesidades das familias coruñesas, aos maiores, aos nenos. Por iso facemos maior esforzo e potenciamos as bolsas de comedor escolar, as bolsas para campamentos, os programas de atención a maiores", explicou Carmen Marón.

Así, ha adianto unha cifra que demostra o compromiso municipal: dedícanse 20 millóns de euros a educación e protección social. Os programas de educación soben unha media do 27%, aínda que algúns como as bolsas de comedor escolar increméntanse un 40%.

En servizos sociais, o talón restaurante sobe un 25%, o comedor social de Monte Alto un 20%, o programa Calor Café de Pai Rubinos un 25%, emerxencia social un 15%, e a Dependencia dedícanse 5 millóns de euros.

E sempre, cada medida, cada acción recollida no Orzamento Municipal, co obxectivo final de xerar emprego, de garantir o emprego, de favorecer a creación de emprego.

Uns 4.500 empregos creados e consolidados

O emprego foi e é unha prioridade para o goberno municipal. Dentro das competencias municipais faise unha forte aposta, ben con investimento público xeradora de emprego, ben a través das políticas activas de emprego, que se desenvolven desde o Centro Municipal de Emprego (apoio ao comercio, apoio aos emprendedores, formación e asesoramento). Máis de 12.000 coruñeses pasaron polo Centro Municipal nestes anos, máis de 200 cursos, máis de 20.000 horas de formación falan do esforzo que se está realizando en materia de emprego.

Emprego é investimento, emprego é tamén os programas sociais, educativos e outros municipais, por iso só a promoción de emprego dedícanse 3,7 millóns de euros, e os programas de cursos de formación e asesoramento soben un 46%.

Ademais, este orzamento é capaz en por si de crear e garantir uns 4.500 empregos (grazas ao investimento, aos programas que xeran actividade empresarial, e ás concesións municipais, que favorecen a consolidación das empresas coruñesas de servizos e por tanto os seus empregos).

Orzamentos realistas, rigorosos e eficientes

Por tanto, en 2011 a cidade contará cuns Orzamentos Municipais que seguen a liña establecida, uns Orzamentos realistas e rigorosos; marcados pola austeridade e a contención do gasto non prioritario, equilibrados, o que permite seguir construíndo unha cidade puxante.

As contas de 2011 son a demostración dunha xestión eficaz e responsable; a proba de que a nosa é unha Facenda saneada e forte, que a pesar da conxuntura económica é capaz de facer fronte ás súas obrigacións e responder as demandas e prioridades dos coruñeses.

Unhas contas que crecen, que impulsan o investimento e potencian a protección social a pesar de que este ano non se conta co apoio investidor do Feil dos dous últimos anos; de que se segue reducindo débeda, e a pesar de que en 2011 seguirán conxelados os impostos, por segundo ano consecutivo, de tal maneira que os coruñeses seguirán pagando o mesmo que en 2009.

Por tanto, o Orzamento máis alto da historia, o máis investidor e o máis social a pesar da crise e para facer fronte á crise. Para amortecer o impacto sobre a cidade, para garantir maiores cotas de benestar e progreso para os coruñeses. Dando un novo impulso ao proxecto de cidade que se está construíndo, avanzando a bo ritmo. E iso é froito dunha planificación seria e medida, dun programa de goberno claro e establecido, que vén executando, que segue adiante.

Por tanto, un goberno municipal que fai os deberes, e que lonxe de botar o freo, dá a cara, enfróntase con decisión á conxuntura económica e mantén firme o rumbo para cumprir os prazos dun proxecto de cidade que camiña cara ao futuro dunha Gran Coruña.