Nunca máis privado

"Esta é a resposta ó berro de socorro da sanidade pú­blica ante a política sanita­ria (da Xunta), que está a deteriorar e a facer invia­ble o sistema como paso previo á súa privatización", advertía onte desde o palco instalado na Quintana o voceiro de SOS Sanidade Pública, Manuel Martín, po­co antes de que se puxese fin, sobre a unha e media, á manifestación convocada pola plataforma. Durante a protesta fíxose énfase na crítica ó modelo de fi­nanciación mixta, con capi­tal privado, para construír os novos hospitais de Vigo e Pontevedra, que, advertiuse, comprometerá de forma irreversible as con­tas do sistema sanitario.

Voceiros de SOS de distintos puntos de Gali­cia denunciaron ademais desde o palco as deficien­cias, promesas incumpri­das e desmantelamentos de servizos sanitarios que lle achacan a Sanidade, des­de a Mariña lucense ata O Salnés.

Martín pechou a quenda de discursos, iniciado por Pa­tricia Vázquez, a encargada de animar o ambiente mentres seguía entrando na praza parte dos ci­dadáns que se sumaron á protesta. "¡Non imos permitir que ninguén fa­ga negocio coa sanidade!", arengou a actriz cómica re­sumindo unha das mensaxes dos manifestantes á Consellería de Sanidade.

A cola para atravesar a Porta Santa na praza difuminábase entón, en­gulipada por veciños de to­das as áreas sanitarias de Galicia que, desafiando a choiva, lle esixiron ó Executi­vo de Feijóo que dea marcha atrás na "barbarie priva­tizadora" da sanidade.

SOS Sanidade Pública anunciara a convo­catoria como un intento de reeditar o éxito de Nunca Máis. Estivo lonxe de lograr o seguimento da histó­rica protesta tras o afundimento do Prestige, pero si fixo notar unha moi nu­trida concorrencia polas rúas do ensanche e o centro histórico. Segundo os or­ganizadores, foron unhas 40.000 persoas. A Poli­cía Local non facilitou unha es­timación de participantes. Entre eles estiveron os líderes do PSDEG, Manuel Vázquez, e BNG, Guiller­me Vázquez, e os sindica­tos CIG, CCOO e UXT, que se sumaron a asociacións veciñais e as 15 platafor­mais de SOS.

Nunca Máis tamén se escoitou nas consignas, co engadido, por supos­to, de privatización, e tam­én nas comparacións sobre o dano que, na opinión dos convocantes, supón para Galicia a estratexia do departamento de Pilar Farjas, caricaturizada nalgunha pancarta ó Bin Laden como "A conselleira talibá. Bin. Farjas". "Esta é unha nova marea de chapapote, pero non afecta só á costa, se­nón a toda Galicia", compa­rou Patricia Vázquez.

A manifestación arrincou da Alameda compostelá entre proclamas de "O público é servizo, o privado é beneficio" e "Non, non, non, á privatización" , así como consignas contra o presidente da Xunta como: "Feijóo ti es culpable".

A chuvia respectou a manifestación ata o discurso final do voceiro da plataforma SOS Sanidade Pública, Martín García, quen previamente, en declaracións aos medios, lle pediu a sociedade galega "un grande esforzo", "por enriba da ideoloxía política", para acabar coa redución "drástica" do gasto público.

A RESPOSTAO Sergas, rotundo: "É e será 100%" para todos

A xerente do Servizo Galego de Saú­de (Sergas), Rocío Mosque­ra, vinculou onte a marcha de SOS Sanidade Pública a "intereses políticos ou á proximidade das eleccións" municipais e quixo contrarrestar a mensaxe reiterada polas rúas de Santiago recalcando que a sanidade galega é "cento por cento pública" e que os futuros hospitais de Vigo e Pontevedra, a pesar da fórmula de financiamento mixto que se utilizará pa­ra a súa construción "son e serán cen por cento públi­cos".

"Toda a atención será prestada polos profesio­nais do Sergas", subliñou Mosquera durante a súa visita ó Hospital Lucus Augusti, que empezará a funcionar hoxe mesmo. "Os confli­tos políticos ficticios xe­rados por intereses que non son os dos pacientes e profesionais só reper­cuten negativamente neles", engadiu. Sobre a posta en marcha do Hospital Lucus Augusti, Mosquera destacou que colocará Lugo "á vangarda sanitaria" os próximos 50 anos, e será un dinamizador da economía da cidade.
REACCIÓNSPSdeG: "É a fin do Benestar"

O secretario xeral do PSdeG, Pachi Vázquez, encabezou a representación dos socialistas galegos, e expresou unha "inmensa preocupación por como o Goberno galego tenta desmantelar un dos piares básicos do sistema de benestar". Así, deixou claro que "milleiros de cidadáns a título persoal e representados en diversos colectivos, estamos aquí para esixirlle a Feijóo que deixe de ser o inimigo público número un da nosa sanidade".

BNG: "Hai que frealos en seco"

O voceiro nacional do BNG, Guillerme Vázquez, esixiu durante a manifestación "frear en seco" a política "privatizadora" e de "dilapidación de diñeiro público" do Goberno de Núñez Feijóo, ó tempo que outorgou "un alto e claro si" á sanidade pública. Neste sentido, criticou que as actuais políticas sanitarias da Xunta "darán peor prestación de servizos no futuro", mentres que tamén valorou a mobilización de "miles de persoas".
Fuente y autor: I. CASAL/Galicia hoxe