O Sergas pinta mal

O presente e futuro do Sergas pinta mal, ou polo menos, así o considera Manuel Martín, o presidente da Asociación para a Defensa da Sanidade Pública, quen, sen dubidar, vaticina que "nun prazo de dous ou tres anos se vai producir o colapso económico e a insostibilidade da sanidade pública galega". Isto pode derivar, asegura, en algo que "xa está pasando en Valencia e en Madrid, onde cada vez se oen máis voces dicindo que como o sistema non é sostible economicamente haberá que acabar coa gratuidadade da asistencia tal e como hoxe a entendemos". O escenario é tremendamente preocupante e xa o veremos", advirte.

Martín asegura que as situacións de deterioración son palpables. "Por exemplo, as listas de espera estanse pechando e maquíllanse como poden; o malestar nos centros de atención primaria é manifesto debido á paralización do plan de mellora; e nos hospitais, programas que estaban funcionando de detección precoz de cancro e tratamento están paralizados", denuncia.

En efecto, desde que un paciente vai ó seu médico de cabeceira por unha doenza que lle fan as probas pertinentes, lle dan os resultados e se lle prescribe un tratamento poden pasar, nalgúns casos, anos. E ante esta situación, a pregunta é: Está perdendo a súa utilidade a sanidade pública e realmente está en risco este sistema? Por onde pasa a solución?

Para Martín, a sanidade pública non pode deixar de ser útil e advirte de que "a cidadanía non podemos pagar co noso diñeiro esta atención". Neste sentido, amósase totalmente contrario a un hipotético sistema de co-pagamento como solución para mellorar a sanidade e exemplifícao. "En Norteamérica hai corenta e pico millóns de persoas sen dereito á asistencia sanitaria e supón unha mortalidade de 200.000 ó ano, ademais de ser a principal causa de ruína familiar", asegura, para engadir que "o copago non ten ningún sentido, xa que é unha taxa á enfermidade que afecta ós sectores economicamente máis débiles. A pensión media galega dos xubilados é de menos de 600 euros ó mes, se de aí temos que detraer pagos para medicamentos ou para o médico non lles chega para vivir", calcula.

Non obstante, Martín si que ve con mellores ollos un posible aumento dos impostos para financiar mellor o Sergas. "Sempre que sexa de xeito progresivo e que o que máis diñeiro gaña pague máis impostos e o que menos pois case nin pague", matiza.

Ante todo, Martín chama a "volver á racionalidade". "Somos o país de Europa que ten menor gasto público, somos o país que menos gasto sanitario temos de toda a UE desenvolvida, somos o país que menos presión fiscal ten e onde os impostos están peor repartidos. A clase media, os que viven dun salario, son os que están pagando e mantendo o sistema, e mentres, ós sectores con máis capacidade económica quitáronlles o imposto e patrimonio, o imposto que grava a actividade industrial, etc, etc, non parece razoable. Se queremos manter o noso sistema sanitario hai que capitalizalo, meterlle diñeiro, e iso pasa por que os que non están pagando nin un duro, que son os que máis diñeiro teñen, empecen a pagalo", conclúe.

Outra saída importante, segundo el, tamén pasaría por reducir o gasto farmacéutico a través de máis xenéricos, e por acabar coa "irracionalidade", xa que, calcula, "o 40% das probas diagnósticas que se piden carecen de xustificación científica e o 30% dos tratamentos tamén. "Hai que mellorar a calidade da asistencia, hai que garantir a integralidade, hai que mellorar a atención primaria para que non teña que derivarse ós hospitais a moitos pacientes e a atención preventiva está baixo mínimos porque se lle está quitando o diñeiro tamén. Nin se fai prevención nin nada e isto haino que cambiar, porque senón a Primaria vaise colapsar", conclúe.

Precisamente, a presidenta da Sociedad Española de Directivos de Atención Primaria, Marta Aguilera, reclamou onte unha maior participación destes profesionais no deseño da nova estrutura deste servizo asistencial por parte das comunidades autónomas, coincidindo co inicio na Coruña do XIII Congreso da SEDAP, que se prolongará ata mañá no Palexco.

Manuel Martín

Presidente da Asociación Galega para a Defensa da Sanidade Pública

"Hai que poñer fin á irracionalidade. O 40 por cento das probas diagnósticas que se piden carecen de xustificación científica e o 30% dos tratamentos tamén"
Fuente y autor: ROSABEL CANDAL /Galicia Hoxe