A nova caixa xa anda

O día D, a hora H. Iníciase o pri­meiro e atarefado día de vida da Caixa de Aforros de Galicia, Vigo, Ourense e Pontevedra. A caixa única para tres millóns de clien­tes, con presenza en toda Espa­ña e o 45% do mercado galego inicia o seu percorrido ás nove da mañá no Rexistro Mer­cantil da Coruña, onde será inscrita. Será a primeira entidade financeira que o faga en galego, nun feito histórico que permi­tirá o seu nacemento legal, para todos os efectos.

Tamén será a pri­mera vez que se reúna o seu consello de administración en Vigo, no que exercerá as funcións de pre­sidente Julio Fernández Gayoso e que contará coa asistencia do copresidente, Mauro Varela, do director xeral, José Luis Pego, e do director xeral adxunto exe­cutivo, Javier García de Paredes.

Desde primerísima hora da mañá, despois de que direc­tivos da entidade presenten os estatutos e a escritura da enti­dade asinada o luns en Compos­tela no rexistro herculino, os clientes de Caixa Galicia e Caixa­nova pasarán a ser un só nas súas mil trescentas oficinas. Os seus preto de dous millóns de tarxe­tas de crédito e débito operativas poderán utilizar tamén indis­tintamente, sen aboar comisión ningunha, os mil cincocentos caixeiros dos que dispón a suma das dúas caixas de aforros galegas.

Fontes da nova entidade confirmaron nun comunicado que, co seu rexistro na Coruña -onde estará a sede social- convértense para todos os efectos legais nunha soa, que terá, á fin da súa integración completa, máis de 1.000 sucursais, pois estiman o peche do ámbito de 300 oficinas (segundo as respectivas memorias de 2009 teñen 1.391 abertas na actualidade).

Deste modo, a nova caixa galega finalizou a primeira fase da súa integración tecnolóxica -o proceso completarase nos primeiros 18 meses do período de transición- e iso permitiralles ós clientes realizar as operacións máis habituais en calquera das oficinas dunha e doutra marca. As entidades explicaron que, ata o momento en que se produza a integración tecnolóxica plena, os centros de procesos de datos de ambas as dúas estarán "intercomunicados" para replicar cada día as bases de datos de clientes en todas as oficinas. Os empregados terán acceso á información de clientes tanto de Caixa Galicia coma de Caixanova e atenderanos con independencia da caixa de procedencia.

A primeira en escriturarse en galego

Ademais, a nova caixa será "a primeira entidade financeira en escriturarse en galego", segundo destacaron Caixa Galicia e Caixanova. Os seus directivos presentarán na nosa lingua ditos estatutos e a escritura no Rexistro Mercantil da Coruña, "un fito histórico que permite o nacemento legal da entidade".

A decisión de facer a escritura en galego constitúe "un xesto de respecto, arraigamento e compromiso non só con Galicia, senón tamén coa súa lingua e cultura, subliñaron as caixas, que insistiu que é a primeira entidade financeira que presenta o seu documento fundacional no Rexistro nesta lingua e "unha das poucas empresas que está constituída en galego, ademais de en castelán".

Os directivos quixeron "facer unha demostración do papel que lle adxudican ó galego, un paso cara a adiante desde os avances que, por separado fixeron nos últimos anos", agregan as dúas entidades. Entre a documentación que se entregará atopa a escritura de fusión asinada o luns en Santiago polos dous copresidentes, Julio Fernández Gayoso e Mauro Varela.

OS DATOS
OK á saída de Reganosa

O vicevoceiro parlamentario do PPdeG Pedro Puy restoulle onte importancia á venda das participacións de Caixa Galicia e Caixanova na planta de Mugardos Reganosa, antes de advertir de que a "importancia" da nova entidade resultante da súa fusión para a armazón produtiva galega vai "moito máis alá" de que nunha operación concreta "se"desprendan dunhas accións ou non".

Competencia vixía o proceso

O presidente da Comisión Nacional de Competencia (CNC), Luis Berenguer, advertiu de que "hai mecanismos para actuar" sobre posibles "condutas anticompetitivas" se, nun futuro, o "reforzamento" de posicións que suporá a fusión de Caixa Galicia e Caixanova no mapa financeiro. Así, asegurou que estas operacións se aprobaron por parte do organismo "na súa primeira fase".
S. RIVEIRO/Galicia hoxe