Leiceaga manterá o cargo pero o seu "desafío" terá consecuencias

Non hai marcha atrás na máxima dun dirixente un cargo público, pero se unha freada na anunciada decapitación do voceiro do grupo parlamentario, Xaquín Fernández Leiceaga. O líder do PSdeG, Manuel "Pachi" Vázquez, que sondou a posibilidade de relevar non só a Leiceaga senón a toda a dirección do grupo parlamentario por poñer reparos a asumir a incompatibilidade entre o cargo de edil e a acta de deputado autonómico, rebaixou onte o ton da ameaza.

"Non se pode dar por feito, por agora, que se vaia acordar al- gunha substitución", aseguraron afíns a Vázquez, que insistiron en que na executiva de mañá xoves verase, con todo, que a decisión acordada dunha persoa un cargo "non ten marcha atrás". A pesar da freada, os afíns ó líder do PSdeG manteñen que as críticas de Fernández Leiceaga ó proceso non debesen saldarse "sen consecuencias".

Leiceaga e outros destacados membros do grupo parlamentario como Mar Barcón, Modesto Pose, Carmen Gallego ou Guillermo Meijón ven un agravio que as incompatibilidades se apliquen radicalmente a quen teñen escano no Pazo do Hórreo, pero non aqueles que son parlamentarios no Congreso dos Deputados ou no Senado.A división aberta tanto na executiva socialista como no grupo parlamentario non inqueda a Manuel "Pachi" Vázquez. "Catro persoas non poden pasar polo forro o acordo adoptado no último congreso celebrado en Pontevedra. Os acordos están para cumprilos", apuntan algúns dos seus afíns, que non ven neste desafío unha debilitación do partido ante as próximas eleccións municipais do mes de maio nin do liderado do propio Vázquez á fronte dos socialistas galegos.

Acúsanno de querer "blindar" a súa candidatura á Xunta

Os críticos teñen un criterio totalmente diferente e aseguran que "Pachi" Vázquez busca unicamente reforzar o seu liderado para blindar a súa candidatura á Xunta, aínda que para iso teña debilitar o partido de cara ós comicios municipais de maio.

O sector que arroupa a Leiceaga considera que Vázquez "foi demasiado lonxe" ó forzar a división interna. Asegura, por iso, que no pulso aberto "ou gaña, ou terá que irse". Os críticos manteñen que son "persoas de razóns, máis que de contas" e que non analizaron en detalle os apoios que teñen tanto na executiva como no grupo parlamentario.

De levarse a votación, o portavoz podería manterse

En todo caso, dunha primeira lectura rápida apuntan que "é posible" que Vázquez sume máis votos na executiva se somete o texto a votación, pero, pola contra, tamén "é probable" que quen defenden os postulados de Fernández Leiceaga derroten a pretensión do líder de facer cambios no grupo parlamentario. "Se isto sucede ten que irse", apuntan, por iso é polo que Vázquez empeza xa a preparar un camiño para dar marcha atrás no seu intento de forzar a dimisión da dirección do grupo.

As mesmas fontes remarcan que a negativa das posibles substitucións propostas por Vázquez para Leiceaga no grupo parlamentario, como Guillermo Meijón ou Abel Losada, deixan escasa marxe para atopar recambios rodados con garantías para exercer o cargo no nivel óptimo.

Os críticos coa decisión de Manuel Vázquez, que comparten a filosofía de fondo de "unha persoa un cargo", cren que o regulamento aprobado debese aplicarse con criterios amables "e non cunha estratexia suicida, que rompeu ó partido".

Losada defende que a voz dos concellos estea no Parlamento

O alcalde da Coruña e secretario xeral da Agrupación socialista da provincia reclamou onte "flexibilidade" á hora de aplicar a máxima de "unha persoa, un cargo". Javier Losada, que tamén é senador, defendeu a presenza de edís e alcaldes nas Cámaras para que nelas se escoite "a voz do municipalismo". "Que A Coruña teña concelleiros ostentando cargos como parlamentarios autonómicos, senadores ou deputados no Congreso permítelle á cidade estar situada nos centros de decisión", apuntou o rexedor herculino. Por iso, e ante a decisión case inamovible de "Pachi" Vázquez, Losada avogou por aplicar un criterio de flexibilidade nos partidos para elixir "á mellor persoa que lles poida representar".

A este respecto, Javier Losada confirmou que lle pediu á actual concelleira de Facenda, voceira do grupo municipal socialista e deputada no Hórreo, Carmen Marón, que repita como "número 2" na súa candidatura nas próximas eleccións municipais, aínda que non avanzou a resposta a esta solicitude. O rexedor e candidato á reelección evitou pronunciarse sobre a posibilidade de que a actual voceiro do PSdeG, Mar Barcón, vaia nesta candidatura. Ao respecto, o alcalde da Coruña indicou que "queda tempo" e engadiu que, fronte "a partidos que están a pensar nas eleccións", con alusión ao PPdeG, no seu caso está dedicada "a gobernar".

Unha cea de Nadal en tensión

O espírito do Nadal non presidiu onte, precisamente, a tradicional cea do gupo parlamentario do PSdeG nunha casa rural de Santiago de Compostela, na que si estivo presente Manuel Vázquez, pero non Xaquín Fernández Leiceaga. Os deputados recoñeceron que están atravesando por "momentos desconcertantes" e retrataron con ironía a celebración do Nadal botando man das imaxes dos vellos telefilmes do oeste americano. "Antes de entrar no salón deixen as súas pistolas!", resumía un asistente ó acto. Este, do mesmo xeito que outros compañeiros de escano no Pazo do Hórreo, daban por sentado que a velada fixada para as dez da noite non achegaría luz ó conflito xerado.
Fuente y autor:
XAIME LEIRO/Galicia hoxe