"Nunca xamais vin unha executiva tan dividida como esta" División "nunca antes vista" nas filas de Pachi

"Nunca xamais vin unha executiva tan dividida como esta". Avístase treboada nas filas de Pachi Vázquez. A súa doutrina sobre a incompatibilidade de cargos levanta grande ira nunha parte da dirección, crítica coa intención de aplicar a iniciativa "un home ou unha muller, un cargo" aos deputados autonómicos de cara ás eleccións municipais. De feito, o líder socialista non levou finalmente ao Comité Nacional a resolución prevista nesta liña. Fontes do despacho de Vázquez, con todo, aseguran que hai consenso total e que a norma será aplicada tanto na cita coas urnas locais do 2011 como o ano seguinte, na elección de deputados estatais e senadores.

A filosofía "un home ou unha muller, un cargo", que Pachi Vázquez levou na man no seu nomeamento como secretario xeral dos socialistas, estipula que todos aqueles deputados autonómicos que queiran concorrer ás listas municipais deben renunciar á súa acta de parlamentario. O mesmo ocorre á inversa no caso de deputados estatais e senadores. De feito, a norma forma parte do propio regulamento interno do PSOE, pero non se está cumprindo: o alcalde da Coruña, Javier Lósada, é senador; e o deputado en Cortes Domingo Tabuyo tamén é edil en Cambados. É o caso tamén de Carmen Marón, que ademais de concelleira na cidade herculina é parlamentaria nas Cortes.

Malia haber un sentir unánime a favor da máxima de Pachi, a forma de aplicación non acada ese mesmo consenso nas filas socialistas. Mentres que desde o propio despacho de Vázquez aseguraban onte que nas eleccións municipais se aplicaría rigorosamente, outras fontes consultadas por este xornal tras a celebración da Comisión Nacional do PSdeG, en Santiago, negaron que onte se chegase a acordo algún. Parte da dirección opúxose a ter que renunciar en xaneiro, e por escrito, á acta como deputado no caso de producirse esa incompatibilidade. O líder socialista non presentou, xa que logo, a resolución prevista nesta liña. A tentativa quedou finalmente en debate no marco da Executiva Nacional posterior, aonde Vázquez "levou un papel" sobre o que se debatiu cun "fifty-fifty" de apoios", aseguran as mesmas fontes das filas socialistas consultadas por "GH".

Un debate ben acalorado na medida en que as intencións do líder do PSdeG se interpretaron como un ataque directo a Modesto Pose, cabeza socialista na provincia de Pontevedra e que pretende formar parte da lista do PSdeG en Vilagarcía, ademais de manter a súa acta de deputado autonómico. Temén Xaquín Fernández Leiceaga, compaxinaría o seu cargo co de edil en Compostela; ou Mar Barcón, quen conservaría cadeira no Parlamento galego e mais na corporación herculina. A proposta de tamén prexudicaría á ferrolá Beatriz Sestayo e ao monfortino Tomé Roca, e crearía, din os críticos, "dirixentes de primeira e de segunda".

Nese grupo de voces contrarias hai tamén quen fala dunha "división nunca antes vista" na executiva socialista e quen califica de "encerrona" o vivido onte en Compostela.

Así, segundo fontes consultadas por Europa Press, Pachi Vázquez "apareceu de súpeto nunha reunión que xa tiña orde do día, cun papel para facer asinar". Papel este no que "se discriminaba" os deputados autonómicos -chamados a firmar xa- fronte aos estatais, que teñen como prazo o ano 2012.

"Non se pode chegar así a unha executiva, que aínda por riba se convoca con media hora de distancia respecto a un Comité Nacional". Abriuse, xa que logo, "un debate moi dividido" polo que "non se someteu a votación a resolución, que se adiou", aseveraron as mesmas fontes, para engadir: "Aínda por riba, Pachi dixo no peche do Comité que se aprobara un acordo".

Efectivamente, desde o gabinete do líder socialista aseguraron onte o apoio da executiva socialista a "un home, un cargo", e mesmo confirmaban que será de obrigado cumprimento tanto nas eleccións municipais do 2011 como nas de deputados estatais e senadores do 2012, ás que "todos os concelleiros ou alcaldes que queiran concurrir terán que renunciar ao cargo".

Respecto das voces que negaban o consenso, as mesmas fontes afirmaron que "o problema é que hai catro ou cinco deputados que non queren renunciar e a están liando, pero o apoio é maioritario e non hai que votalo, dáse por adoptado e terán que asumilo". Ademais, "non é unha ocorrencia nin unha improvisación, é unha "proposta xa apoiada" no seu momento "con máis do 90 por cento de apoios", engadiron desde o despacho de Vázquez.

Entregados "en corpo e alma"

Vázquez defendeu a iniciativa para que cada persoa que se presente o faga "en corpo e alma, e para entregarse as 24 horas do días" e agradeceulles aos compañeiros que "dende o punto da coincidencia, ou mesmo ás veces dende a discrepancia" acepten este compromiso. Ofreceulle o seu apoio o ministro de Xustiza, Francisco Caamaño, quen o considerou un "elemento fundamental da democracia".
LAURA CAMINO /Galicia hoxe