O presidente da Mesa négase a declarar por lle negaren 'o dereito legal' a recibir notificacións e documentación en galego

O presidente da Mesa pola Normalización Lingüística compareceu esta mañá nos xulgados de Fontiñas en Santiago de Compostela, onde se negou a declarar por lle negaren "o dereito legal" a recibir as notificacións e a documentación en galego, tal e como xa solicitara no seu día. "Isto é unha inxustiza: denuncian a quen defendemos a cultura galega e o cumprimento da legalidade e impídennos exercer os nosos dereitos lingüísticos na propia administración", lamentou Callón, quen subliñou que parte desta documentación "non pode estar en galego porque o impide o programa informático da Xunta". "Aí está a liberdade lingüística de Núñez Feijóo!", ironizou.

O dirixente da maior asociación cultural de Galiza foi denunciado polo xuíz decano da Coruña, Antonio Fraga Mandián, quen considera que son penábeis as declaracións de Callón reprochándolle o incumprimento da Lei de normalización lingüística.

O portavoz da Mesa rexeitara con contundencia a declaración do maxistrado que reproduciran medios de comunicación que estiveran presentes no xuízo contra o veciño da Coruña: "No tengo ningún rubor en usar la ilegalidad del topónimo La Coruña". Para Carlos Callón, esta afirmación constituiría unha "apoloxía da desobediencia da legalidade, que sería especialmente grave ao se tratar dun maxistrado, quen non debería guiarse por ningún outro criterio na súa función pública que non fose o da plena aplicación da lei."

Para o presidente da entidade cidadá en defensa da lingua, esta denuncia "encádrase nunha campaña moito máis ampla de criminalización dos movementos en defensa do idioma de Galiza, como xa puidemos ver tamén recentemente cos equipos de normalización lingüística dos centros de ensino". Porén, Carlos Callón sinala que "se agardan que calemos a boca e deixemos de defender a nosa lingua, poden seguir agardando". "O esforzo colectivo que representa A Mesa pola Normalización Lingüística seguirá alzando a súa voz sempre que haxa calquera discriminación contra calquera persoa polo mero feito de querer vivir en galego", conclúe.