Planos de guerra

O idioma segue marcando a axenda de Alberto Núñez Feijóo á fronte da Xunta e o pleno do Parlamento de onte deixou claro que a situación para o goberno do Partido Popular (PP) está resultando incómoda. Boa proba é que a algúns dos asistentes como público se lles prohibiu a entrada á cámara porque levaban unha camiseta de Queremos Galego cando, precisamente, o que os deputados ían discutir era unha Iniciativa Lexislativa Popular (ILP) desta plataforma "pola defensa dos dereitos lingüísticos". A situación resulta aínda máis sorprendente se temos en conta que un dos deputados, Bieito Lobeira, do BNG, levaba unha camiseta idéntica e falou con ela desde a tribuna de oradores. Como pano de fondo, brillou o último informe do IGEA, o instituto que preside Anxo Quintana, defendido por socialistas e populares, pero silenciado polo BNG, que xa tivo máis dun problema interno polos termos nos que se posiciona este informe, partidario de asumir o bilingüismo.

O debate parlamentario estivo tamén en liña coa crispación que caracteriza a política lingüística desde a pasada campaña electoral das pasadas autonómicas, cando o PP se aliou coas teses de Galicia Bilingüe e comezou a baduar coa tese da imposición. O guión non cambiou ostensiblemente onte e os deputados conservadores rexeitaron a proposición de lei -presentada polo BNG- que termaba da ILP de Queremos Galego para reclamar o uso do idioma propio nas administracións da comunidade e no ámbito do ensino. Para o PP, a iniciativa reproducía "todos os defectos" da política lingüística do nacionalismo e acusou o BNG de pretender construír "un estado nacional monolingüe en galego".

O deputado popular Agustín Baamonde, que chegou a traducir ao castelán uns versos de Rosalía de Castro para demostrar que a matriarca literaria do país era bilingüe, explicou a postura do seu grupo nun aceso debate. A pesar de que Lobeira avogou na súa primeira intervención por aproveitar este pleno para "restablecer consensos" en materia lingüística, Baamonde foi contundente. O deputado cuestionou o "mesianismo" dos nacionalistas que se cren en posesión da única verdade" e o seu "enroque numantino" arredor da lingua que "imposibilita", na súa opinión, calquera acordo.

Baamonde incidiu en que a iniciativa non é "expresión da maioría social nin froito do consenso" e remarcou que a vontade "do 15 por cento" da poboación galega non pode "imporse ao 85 por cento" restante. "O seu propósito é darlle unha volta máis ó monolingismo en galego, que pasaría a ser a lingua prevalente e o castelán, residual", advertiu.

Fronte a iso, insistiu en que o PPdeG defende que a política lingüística debe "estar asentada na maioría social" e fixo un chamamento a romper a "monolítica postura" do BNG para alcanzar "un pacto". Con todo, apuntou que o recente informe do Instituto Galego de Estudos Autonómicos e Europeos (IGEA), presidido polo deputado nacionalista e ex vicepresidente da Xunta Anxo Quintana, supón "un paso adiante".

"Ou ten que ler con máis atención ou revisar a súa capacidade para interpretar textos escritos", contrapuxo o nacionalista Bieito Lobeira, quen ironizou co "amor" dos populares cara ó galego ó apuntar que se está caendo no "paroxismo da ridiculez" e lamentou a postura da formación que lidera Alberto Núñez Feijóo.

"Pero non pasa nada", engadiu o deputado nacionalista, antes de recordar que, ó longo da historia, houbo "galegos tímidos e domesticados, que se avergoñaron da súa procedencia". "Entraron vostedes nese selecto club de renegados", engadiu, a continuación, e dirixiuse a Feijóo para sentenciar: "Son o peor deste país"

Lobeira remarcou que os populares pasarán á historia "por atacar o galego" como nunca se fixo na comunidade e agregou que "todo é mérito" de Feijóo. "Haberá que reivindicar e confrontar na rúa o que aquí se nos nega, e aí estará o nacionalismo", finalizou a súa intervención o deputado nacionalista.

Ao debate asistiron un grupo de simpatizantes de Queremos Galego, encabezados polo seu voceiro Carlos Callón, ós que, segundo manifestou Lobeira na súa primeira intervención, se lles impediuse entrar no hemiciclo "cunha camiseta" que levaba un lema "nun idioma proscrito", en referencia ó galego, o que considerou "unha vexación".

O deputado nacionalista referiuse a unha camiseta co logotipo de Queremos Galego e recordou que os integrantes da plataforma asistiron como público e non defenderon o seu ILP desde a tribuna "por unha decisión inxusta" da Mesa do Parlamento.

RÉPLICA SOCIALISTA
A mensaxe noxenta do PP

O deputado socialista Francisco Cerviño alertou de que o presidente galego "pode chegar a ser un lingüicida" e acusouno de lanzar "dous torpedos de groso calibre" ao galego co novo decreto do idioma no ensino e a modificación da Lei de acceso á Administración pública. "Lanza unha mensaxe noxenta, profundamente prexuizosa e falsa", lamentou. Sobre a proposición, manifestou a coincidencia do seu grupo "co tronco" da proposición, a pesar de manter "algunha discrepancia", como o apartado relativo a que as distintas administracións "regularán o galego como lingua oficial"."O galego xa é lingua oficial e se o que se pretende é buscar un subterfuxio para que sexa a única, non nos parece ben", avisou Cerviño e recalcou que Galicia é "bilingüe", como explicitaron "algúns destacados membros do BNG no informe do IGEA".
Fuente: Galicia hoxe