245.831, e subindo...

O número de parados rexistrados en Galicia nas oficinas dos servizos públicos de emprego situouse na fin de xaneiro en 245.831 persoas, tras incrementarse os desempregados en 8.518 no primeiro mes do ano, un 3,59% máis que en decembro do 2010, segundo os datos do Ministerio de Traballo e Inmigración. En toda España, o número de desempregados superou os 4,2 millóns de persoas, tras subir en 130.930 os inscritos nos servizos de emprego, cun aumento porcentual do 3,2% respecto a decembro. A comunidade galega, oitava cun maior incremento do paro en xaneiro, sitúase así catro décimas por encima da media estatal. Na comparación interanual, a suba alcanzou o 6,13%, ó contabilizarse 14.203 persoas máis que no primeiro mes do 2010.

Por sectores, o incremento máis acusado corresponde ós servizos, un 5,23%, ata os 133.603 desempregados. Na construción estaban rexistrados ó peche de xaneiro 39.624 parados, un 2,84% máis que o mes anterior; no colectivo sen emprego anterior o incremento foi do 1,33% (28.805 persoas); na agricultura o aumento foi do 1,1% (6.590 parados) e na industria o ascenso foi do 0,84% (37.209 persoas). No eido estatal, en xaneiro, o paro aumentou en todas as rexións, menos Baleares, onde baixou en 562 persoas. As subas estiveron encabezadas por Cataluña, con 26.950 desempregados máis, Andalucía (26.622 parados) e Comunidade Valenciana (12.485).

O BNG advirte de que os datos "baten un récord histórico" e poñen a Galicia "en situación de urxencia". En contra da consideración dos populares, a formación frontista denuncia que, coa información do primeiro mes do ano, "consolídase a tendencia negativa para Galicia, que desde setembro aumenta en termos porcentuais". Nesta liña, o deputado nacionalista Henrique Viéitez responsabiliza da "sangría" a Alberto Núñez Feijóo, a quen critica por "culpabilizar" o Goberno central. "Non hai políticas activas de emprego e todo se reduce a plans baleiros", censurou Viéitez. "Tampouco hai políticas industriais e bótase de menos a valentía política", incidiu, ó entender que o responsable galego debería comparecer no primeiro pleno do ano "para explicar por que Galicia se comporta peor que o resto do Estado".

Ademais, a secretaria xeral de Galiza Nova, Iria Aboi, afirmou que son cifras "arrepiantes" no tocante ós mozos, o cal ratificou o deputado do BNG ó alertar da "emigración xuvenil" en tales circunstancias..

UXT-CCOO-CIG

Os sindicatos, contra a "ineficaz" reforma laboral

Os sindicatos UXT, CCOO e CIG advertiron de que a cifra de parados de xaneiro (245.831) supón un "máximo histórico" nos rexistros. UXT destacou que Galicia rexistra, cos datos de xaneiro, "cinco meses ininterrompidos de crecemento do paro por encima do Estado" e indicou que as cifras "reflicten unha situación laboral complexa". CCOO coincidiu con UXT en pedir a "reversión da reforma laboral" e insistiu en que é necesario un cambio no sistema financeiro. A CIG tamén cualificou a reforma laboral de "totalmente ineficaz" e advertiu de que a precarización das condicións laborais provoca "un auténtico drama social" que forza a emigración de "miles e miles de membros das xeracións máis preparadas da historia do país".
Fuente: Galicia hoxe