A Mesa lamenta o 'sectarismo e manipulación' do Observatorio da Lingua Galega da Xunta

A Mesa pola Normalización Lingüística denuncia o "uso sectario e manipulador" que a Xunta de Galiza fai do Observatorio da Lingua Galega. Este órgano, dependente da Secretaría Xeral de Política Lingüística, envía cada semana un boletín electrónico coas principais noticias sobre os idiomas do mundo e tamén o que acontece en Galiza. "Na realidade, neses boletíns un pode saber dos grupos que actúan en defensa de calquera idioma nos antípodas do planeta, mentres para Galiza censura ou edulcora todas as informacións críticas ou diverxentes coa política oficial da Xunta", denuncia o presidente da Mesa.

Carlos Callón pon como exemplo que no boletín enviado hoxe mesmo polo Observatorio da Lingua Galega se inclúen noticias sobre o que acontece en Cimbabue, Cuenca, Escocia, Canadá ou Paquistán e seis comunicados de prensa da Xunta de Galiza, mais que "desapareceron todas as informacións críticas remitidas pola Mesa nos últimos días, como se non existisen". "Hai varios meses, desde a asociación protestamos por esta censura, mais a situación continúa na mesma", sinala Callón.

A Mesa considera que "esta manipulación informativa é impropia dunha administración seria e cívica" e pregúntase "canto nos custa a todos os galegos e todas as galegas esta parvada, mentres os nosos dereitos lingüísticos continúan a ser vulnerados un día si e outro tamén".