A por accionariado

Novacaxaigalicia iniciará os trámites para crear un banco propio e adaptar a súa situación ó marco normativo vixente, tras a aprobación do decreto lei de reforzamento do sistema financeiro. Con esta decisión, a caixa traspasará o seu negocio financeiro ó banco, a través do que captará máis capital para cumprir os requisitos establecidos polo Goberno e o Banco de España. A caixa non aclarou se aspira a manter este status xurídico ou optará por outras fórmulas para controlar ese banco, pero si indicou que acelerará os traballos de captación de novos accionistas. A este respecto, o hermetismo é total, pero a ninguén se lle escapa que os empresarios e as grandes fortunas galegas son as preferidas. Non obstante, a caixa "non descarta a ningúen".

A prioridade: manter a máxima vinculación co país

A decisión foi tomada onte durante a celebración do consello de administración da entidade, no que se fixaron como criterios que o novo proxecto de capital teña como obxectivos a obtención da "máxima vinculación con Galicia e o maior investimento social", á vez que cumpre cos novos requisitos. A alternativa avanzada fora gañando peso nos últimos días, logo de trasladar a dirección ós membros da comisión delegada que a bancarización era xa a vía principal, aínda que non estaba tomada ningunha decisión, e tras facer pública este mércores a súa aposta a Xunta, tamén a favor de trasladar o negocio a un banco controlado ben pola caixa ben por unha fundación especial.

A caixa busca, ó trasladar o negocio a un banco, ter que reportar un capital principal do 8% -é o que se lles esixe ós bancos, fronte ó 10% das entidades con máis dun 20% de financiamento almacenista e que non coloquen, polo menos, unha quinta parte dos seus títulos a terceiros, caso das caixas-. O Banco de España situou, nas análises sobre a reforma do sistema financeiro no Congreso, o core capital da entidade por baixo do 6%, polo que tería que facer aínda esforzos adicionais para cumprir as condicións.

O coeficiente de solvencia alcanza o 11%

Novacaixagalicia explicou que o consello facultou a un equipo de directivos para "o estudo, exploración e negociación das alternativas escollidas", para que, unha vez se teña toda a información necesaria, se poida adoptar "unha decisión definitiva" nos prazos de capitalización que establece a nova normativa.

Novacaixagalicia indicou onte que, tras a fusión, realizou un dos maiores esforzos de saneamento de todas as integracións en España, seguindo as pautas do proxecto de fusión aprobado polas autoridades supervisoras e reguladoras de Galicia, España e a Unión Europea. Ó peche de 2010, a caixa cifra o seu coeficiente de solvencia por riba do 11 por cento.

CIG: "o Estado condénaa a desaparecer"

Medio cento de delegados da CIG concentrouse onte fronte ó Concello de Vigo para defender a Novacaixagalicia e denunciar que o Goberno central "a condena a desaparecer" cos requisitos que establece no decreto de recapitalización das caixas. O responsable de Banca do sindicato CIG, Clodomiro Montero, denunciou que o novo marco normativo promove a privatización da entidade galega e que "ten intención clara de discriminala", mentres que lles "dá facilidades ás caixas catalás".

A REACCIÓNFeijóo avisa de que esta é a última oportunidade no novo escenario

O presidente da Xunta defendeu a vía proposta pola conselleira de Facenda, Marta Fernández Currás, para Novacaixagalicia como "a menos mala" e advertiu de que se esta non opera a través dun banco quedará "con menos posibilidades de capitalización", posto que o resto de caixas "do seu tamaño" van, "inevitablemente, a constituír un banco" e será "máis difícil competir". Así se pronunciou tras o Consello da Xunta, un día despois de que Fernández Currás afirmase no Parlamento que a "mellor opción" para Novacaixagalicia no actual contexto de reforma do sistema financeiro consiste en converterse en "unha caixa de aforros evolucionada cun banco asociado" sobre o que a entidade fundacional teña o control. "É a fórmula á que obriga a lexislación estatal", recalcou Núñez Feijóo, á vista dos "bandazos" do Goberno, con José Luis Rodríguez Zapatero á fronte, e de que este ten "a decisión tomada" de "sacrificar" as caixas de aforro. Convencido de que a opción da Xunta é a "menos mala", manifestou a súa vontade de "traballar" para para garantir o futuro dunha entidade que aposte polos sectores estratéxicos de Galicia cos partidos, cos axentes sociais, co Banco de España e coa propia entidade, a cuxos órganos de dirección, admitiu, "corresponde tomar a decisión final". Feijóo tamén negou que a Xunta chegue "tarde" á negociación e ó diálogo co Goberno no marco da reforma do sistema financeiro, algo que se está expondo "desde hai un ano", e volveu contrapor a súa actuación "rigorosa" coa "improvisación" do Goberno central.
MÁIS REACCIÓNSUn vogal aduce motivos políticos

Un dos vogais do consello de administración de Novacaixagalicia, José Luis Veiga, afirmou que a entidade deberá ser "o que non quere ser" porque "alguén tomou a decisión política" para iso e acusou á Xunta de sumarse á política do Goberno central "cando di que opta" porque a caixa sexa "un banco". Veiga censurou que "quen tiña que defender a caixa, que é a Xunta, abrazou a política do Goberno", ó revelar que a mellor opción é a da bancarización.

O PSdeG critica a falta de estratexia

O PSdeG mostrou o seu "apoio" á decisión de Novacaixagalicia de "reforzar a súa capitalización para mellorar as súas posibilidades de financiamento" e pediulle que manteña "a maior vinculación posible" coa comunidade. Non obstante, expresou a súa "perplexidade" ante o grao de "descoñecemento" da Xunta sobre "a evolución e as necesidades" de Novacaixagalicia e lamentaronque "non sexa capaz" de deseñar unha "estratexia" para ela.

O BNG lamenta que se tire a toalla

O portavoz nacional do BNG, Guillerme Vázquez, acusou onte á Xunta de Galicia de "tirar a toalla" na "defensa" da caixa galega, e observa un panorama financeiro "preocupante". Así, Vázquez lamentou a actidud da conselleira de Facenda, Marta Fernández Currás, respecto das súas declaracións no Parlamento porque, ó seu xuízo, "demostran que o Partido Popular de Galicia tira a toalla ao efecto de defender o mantemento da caixa como tal".
Fuente: galicia hoxe