Maquillaxe no paro?

Todo apuntaba a que o último -e crispado- pleno tería continuación, e a sesión de control ó presidente da Xunta, Alberto Núñez Feijóo, volveu versar sobre as cifras do paro, coas acusacións do secretario xeral do PSdeG, Manuel 'Pachi' Vázquez de "maquillaxe" nas estatísticas. Pero con anterioridade, o titular do Goberno galego fíxolle un anuncio á Cámara: a solicitude dun "despacho" co seu homólogo estatal, José Luis Rodríguez Zapatero, para abordar o futuro de Novacaixagalicia, facer "as contas" do financiamento autonómico para que o Goberno central "devolva" os 800 millóns de euros que lle "debe" á comunidade e explicarlle "o aforro" que supón o catálogo priorizado de fármacos.

Segundo sinalou na sesión de control da Cámara, realizou "formalmente" esta solicitude "o martes pola noite". Nun momento no que a Xunta ten relevantes frontes abertas co Goberno, Feijóo pretende expoñer cara a cara a Zapatero os beneficios do catálogo de medicamentos, pero tamén abordar a necesidade de que o Executivo central "cumpra" o financiamento e, ante as dúbidas xeradas sobre o futuro de Novacaixagalicia coas novas condicións de solvencia, defender a súa vontade de "manter unha entidade financeira galega". "Xa se que el non vai vir, nunca o fixo desde que son presidente, pero eu estou disposto a ir no momento no que me indique", ratificou Feijóo no debate co que arrancou a sesión plenaria, centrado de novo na sangría do paro.

Non en van, tanto o líder do PSdeG, Pachi Vázquez, como o voceiro parlamentario do BNG, Carlos Aymerich, esíxironlle ó presidente explicacións sobre o "drama" do paro en Galicia e retáronlle a "gobernar" que, en palabras de Aymerich, non consiste en "viaxar a custa do erario público" ou en discutir co dirixente socialista "sobre narcotráfico ou obras ilegais", en velada alusión á polémica en torno á reforma da súa vivenda en San Amaro. Así, o nacionalista apuntou que tanto ós populares coma ós socialistas lles interesa "simular un antagonismo político que non existe" e criticou a Feijóo porque "nin exerce as competencias que ten nin reclama as que lle faltan". Pola súa parte, Vázquez, quen arrancou a súa intervención cunha mención de "respecto" cara a todos os que lograron o "triunfo" da democracia o 23-F, preguntou ó presidente se "admite" que ten competencias para combater o desemprego, tras asegurar recentemente que tiña "poucas ou case ningunha", ou se se declara "incompetente". "Non só recoñezo todas as competencias constitucionais e estatutarias senón que, mentres sexa presidente, traballarei todos os días pola súa implementación", replicou Núñez Feijóo, antes de avisar a Vázquez de que o Parlamento galego "aproba leis" que máis tarde o "seu partido" (o PSOE), dende o Goberno central, leva ó Tribunal Constitucional.

A cartilla de desemprego fronte ó programa de ZP

Mentres Feijóo lles esixía competencias na materia a Madrid, Vázquez amosoulle un documento afirmando que "esta é a cartilla de desemprego que teñen máis de 245.000 galegos e pon Xunta de Galicia", antes de esixirlle a Feijóo que "non se ría nin se esconda dos parados". "Ten todas as competencias transferidas desde o ano 97", advertiu, para recordar, ó tempo, que Feijóo "prometeu solucionar o problema do paro en 45 días" e alcanzar "o pleno emprego" no seu programa electoral, o que interpretou como "un engano" os cidadáns.

No polo oposto, o titular do Goberno galego contestoulle a Vázquez que "o único programa" que prometía o "pleno emprego" foi o do PSOE, durante a última campaña de Zapatero. "Supoño que defendelo (a Zapatero) vaille no soldo, pero non se lle ocorrerá dicir que o problema de non cumprir o pleno emprego que prometeu o PSOE é das políticas da Xunta, ¿ou si?", preguntou.

Tamén 'Pachi' Vázquez acusou a Xunta de intentar maquillar os datos do paro cunha orde para aplicarlles un código novo ós desempregados que levan sen "recibir servizos nos últimos anos", coa finalidade de que deixen de computar nas listas de paro rexistrado. Fronte a iso, a Consellería de Traballo asegura que esta medida emana "dun preacordo" alcanzado no marco do diálogo social e que, con ela, se busca intensificar a actuación sobre colectivos "prioritarios" de persoas en situación de desemprego.

Na sesión de control da Cámara, Vázquez denunciou que a Xunta habilitou "un novo código" para os demandantes que levan nos últimos anos "sen recibir servizos" co fin de que este grupo "deixe de computar" na lista de paro rexistrado e pase a un estado denominado "suspensión por proceso de orientación". Pola súa banda, Alberto Núñez Feijóo evitou polemizar sobre este asunto e limitouse a defender a actuación do Executivo galego durante a súa intervención. Tras o debate, membros do equipo de Vázquez facilitáronlles ós medios un documento que, segundo explicaron, procede da intranet da Xunta, e no que se notifica este "aviso de suspensión" e o seu correspondente código "S-698", que o Goberno galego poría en marcha para intentar diminuír o número de persoas que figuran nas listas do paro na comunidade.

Este documento -con data do 14 de febreiro- sinala que esta situación administrativa denominada "suspensión por proceso de orientación" aparecerá no caso dos demandantes de emprego que, de acordo coa base de datos do Servizo Público de Emprego de Galicia (SPEG), non recibiron "ningún servizo nos últimos anos".

Para poder liquidar esta situación, continúa o aviso, deseñouse "un procedemento de derivación" destes demandantes ó servizo de orientación para avaliar as accións "a emprender con eles". Para os efectos de identificalos, engade, "estableceuse a devandita suspensión por proceso de orientación". Por último, o documento subliña que, unha vez realizadas as accións pertinentes, a suspensión finalizará "reactivándose a demanda".

Traballo: "É un preacordo do diálogo social"

Pola súa banda, fontes da Consellería de Traballo explicaron que o código denunciado polo PSOE non só non é novo, senón que "xa existe e é de aplicación por parte do Estado e doutras comunidades". Pola contra, os socialistas aseguran que non está incluído na listaxe oficial de situacións administrativas que dan lugar "a suspensións" da lista do paro rexistrado.

A Xunta sinalou que este aviso se produce por mor dun preacordo alcanzado hai tres semanas na mesa do diálogo social e que está pendente de ratificar. O seu obxectivo sería actuar "ó longo dun ano" sobre un total de 56.000 parados de longa duración e menores de 30 anos de idade, un colectivo considerado prioritario de actuación.

Mato falará coa Fegamp para cooperar en emprego

A conselleira de Traballo e Benestar, Beatriz Mato, anunciou que convocará a Federación Galega de Municipios e Provincias (Fegamp) para abordar o sistema de repartición do fondo de cooperación de fomento de emprego e conseguir que este sexa "máis eficaz" e chegue da forma "máis axeitada" aos desempregados.

Díxoo despois de "recoller a luva" lanzado polo deputado do BNG Henrique Viéitez quen, durante unha interpretación promovida polo socialista José Tomé, pedira "consenso" para a repartición destes fondos. "Vostede pedíame que falase cos concellos e vouno facer, vou convocar a Fegamp", anunciou no último compás da súa intervención. Beatriz Mato subliñou que falará cos municipios para conseguir que "dalgún xeito sexa máis eficaz e que se acheguen (os fondos) a todos os desempregados da forma máis axeitada", e de forma "independente dos vaivéns da conxuntura económica".

Previamente, a conselleira recalcara que o Executivo autonómic "non "pode decidir" para que se destinan os fondos que recibe do Goberno central, é dicir, que os fondos que son para cooperación (directamente para crear emprego) non se poden utilizar para o programa de formación (de fomento da empregabilidade).

Beatriz Mato tamén aseverou que o propósito da Xunta é lograr un "equilibrio entre o rural e a zona urbana" e rexeitou os reproches do deputado socialista sobre "desproporción e partidismo" na repartición dos fondos de cooperación. A titular de Traballo incidiu en que a consellería "non ten capacidade de destinar" as partidas en función do programa ó que queiran destinar os fondos e recalcou que a nova orde de axudas recolle distintos criterios e ten como obxectivo o "equilibrio e a solidariedade entre territorios".

Pola súa banda, o deputado do BNG considerou que a Xunta "non é capaz de discernir entre partido e goberno", pero recoñeceu que na convocatoria de axudas para concellos deste 2011 retoma os criterios da convocatoria de 2009, o cal atribúe a que en 2010 "foi un desaguisado".
Fuente: Galicia hoxe