Avisan do peche dalgún aeroporto galego

Os sindicatos CCOO, UXT e USO, da coordinadora estatal de Aena, avisan do peche "dalgún aeroporto" en Galicia (Coruña, Santiago ou Vigo) se o Ministerio de Fomento persiste na súa intención de privatizar Aena, tal e como pretende a partir do Real Decreto-lei 13/2010, de 3 de decembro, contra o que as organizacións convocaron 22 días de folga entre o próximo 20 de abril e o 31 de agosto.

A advertencia lanzárona, en roda de prensa, representantes das tres centrais sindicais na comunidade galega, que aseguran que, de ocorrer isto, perderanse postos de traballo, diminuirá a calidade e seguridade do servizo, aumentarase o prezo das taxas aeroportuarias e "o responsábel será a arrogancia do ministro de Fomento", o galego José Blanco, a quen pediron que se comprometa a "plasmar nun documento" o que ata o momento, critican, "son só palabras".

Os empregados da sociedade pública, cun persoal duns 340 traballadores na comunidade autónoma (100 en Alvedro, 150 na Lavacolla e 90 en Peinador, segundo as organizacións), esixen "manter" as condicións laborais do actual convenio, polo que, segundo inciden, o seu caso non é o "dun conflito laboral", posto que non están negociando novos requisitos nin reclaman "privilexios".

Por contra, oponse ao cambio de modelo, que pasa pola concesión da xestión das terminais a empresas privadas, porque, subliñan, o actual é "público e rendíbel". "Sendo así, que sentido ten privatizala?", exclamou na comparecencia o sindicalista de CCOO Alfredo Jiménez.

"A única saída ante esta barbaridade do Ministerio de Fomento é a folga", xustificou, para chamar a atención, do mesmo xeito que os seus compañeiros, sobre o feito de que a solicitude do paro se fixera con 42 días de antelación, o que "cuatriplica" o que marca a lei. "Estamos exercendo un dereito constitucional", defendeu, sobre isto, o membro de USA Ramona García.

Acusan o Goberno de utilizar os pasaxeiros

Respecto da percepción que a opinión pública poderá mostrar ante a postura adoptada polos sindicatos, e despois de que hostaleiros composteláns constaten cancelacións para visitar Santiago, Jiménez argumentou que non son eles quen toman "como reféns" aos cidadáns, senón que "quen os utiliza é o Goberno".

"O ministro di unha cousa publicamente e pon outra enriba da mesa", referendou o responsábel de Servizos e Cidadanía de CCOO en Galicia, Ramiro Otero, tras o que Jiménez pediulles aos cidadáns que, aínda que "é moi fácil ir contra o máis débil", dirixan as súas críticas "contra o máis forte", quen "ten a responsabilidade nesta historia".

Sobre este punto, o responsábel da sección de Aena de UXT na comunidade, Xavier Castro, censurou que "nin Blanco sabe o que quere", posto que, segundo indicou, descoñécese o sistema polo que se realizarán as concesións nos aeroportos. Así, puxo como exemplo o caso galego para sinalar que o ministerio "pode vendelos individualmente ou en conxunto", de forma que resultarían sociedades como "Aeroportos da Coruña S.A." ou "Aeroportos de Galicia S.A".

O luns ou martes, nova reunión entre as partes

O secretario xeral de CCOO, Ignacio Fernández Toxo, sinalou o vindeiro luns 14 de marzo ou o martes día 15 como posíbeis datas para levar a cabo un segundo encontro entre os sindicatos CCOO, UXT e USO con Aeroportos Espa­ñois e Navegación Aérea (Aena) co fin de alcanzar un acordo e desconvocar o anuncio de folga emitido polos trabadores do ente público.

"Vai haber reunións de forma intensiva nas próximas datas", asegurou Toxo tras participar nunha asemblea dos traballadores da empresa de cátering aéreo Gate Gourmet no aeroporto de Baraxas.

O representante sindical xustificou esta prontitude pola existencia da "boa vontade" e a "disposición na negociación" que teñen os "sindicatos de AENA", polo que desexou que se poida chegar a un acordo de forma rápida, canto antes mellor", apostilou.

Toxo sinalou que está en "mans do Goberno" que non se teña que chegar ao extremo" das folgas porque os paros "afectan o turismo e "xeran incomodidade e problemas".

Así mesmo, criticou o "moi preocupado e dilixente" que se mostrou o Executivo para resolver o conflito cos controladores aéreos, mentres que "o resto dos traballadores de Aena viron como se lles ninguneaba e non se facía caso ningún ás demandas que veñen expondo desde hai meses", sentenciou.

Vontade de "seguir falando"

Os sindicalistas, que defenden os intereses "desa xente que pasa desapercibida" nos aeroportos, "electricistas, fontaneiros, informáticos, administrativos", mostraron a súa vontade de "seguir falando" co Ministerio de Fomento "para buscar unha solución". No caso de que non a haxa, adiantaron que "os servizos mínimos se van negociar", aínda que non puideron precisar os voos que deberán cancelarse en territorio galego.
Fuente y autor: EUROPA PRESS /Galicia hoxe