Debate sen consenso

Sen consenso. O segundo debate de política xeral da era Feijóo rematou onte sen acordos clave para o futuro de Galicia. Os motivos esgrimidos polo PPdeG: a falta de propostas dunha oposición que vive "de costas á realidade". Os de PSdeG e BNG: a falta de ambición do Goberno galego, que fixo caer en saco roto os grandes pactos do último debate en torno a un Plan de demografía "que non chegou nin ós orzamentos" e un de reactivación económica que quedou na nada.

Os maiores éxitos para o Goberno: o apoio do BNG para reclamar ante o Estado os 805 millóns en materia de financiamento autonómico -sen descartar a vía xudicial para logralo-, así como a retirada do recurso contra o catálogo priorizado de medicamentos; e o do PSdeG para reclamar un trato igualitario das entidades financeiras que garanta o futuro ligado á nosa comunidade de Novacaixagalicia.

Só o apoio a Clesa logra a unanimidade da Cámara

Xa en solitario tiveron que aprobar os populares dúas das súas grandes propostas para reactivar a economía e as infraestruturas de Galicia e que, tamén, pasaban por reclamancións ó Estado: a demanda do cumprimento do Pacto do Obradoiro para a chegada do AVE a Galicia e para que se proceda á adxudicación do contrato "antes de que finalice 2011", así como máis competencias en materia laboral para lograr a "plena autonomía nas políticas activas de emprego". Coa unanimidade da Cámara só se conseguiu sacar adiante unha única iniciativa, presentada polos populares: a relativa ó apoio dos traballadores de Clesa en Caldas de Reis. Tras transaccionar catro propostas socialistas e dúas dos nacionalistas, o PPdeG tamén amosou o seu rexeitamento á implantación do copago sanitario, ademais de acordar a posta en marcha no seo do Parlamento dun texto que dea lugar a unha nova Lei do solo para Galicia.

Tirapuxa entre Caride e Pilar Rojo polas votacións

O Parlamento logrou, así, aprobar unhas 62 iniciativas, non sen antes asitir a un duro enfrontamento entre a deputada socialista María José Caride e a presidenta do Parlamento, Pilar Rojo, polo sistema de votación.

A pesar de que as 37 proposicións de resolución presentadas polo PPdeG onte na Cámara foron definidas polo deputado Pedro Puy como as "fundamentais para saír da crise", a oposición asegurou que o maior problema dos galegos -a situación económica e o desemprego- non foi tratado polo Goberno na Cámara. "Non hai goberno e o presidente non está á altura", asegurou a nacionalista Ana Pontón, quen acusou a Feijóo de "fracasar" en todas as frontes que ten abertos o país: financiamento, caixas, loita contra a crise e desemprego. Máis alá foi o voceiro do PSdeG, Abel Losada, quen acusou os populares de vivir nunha realidade paralela -para o que fixo uso do mito da caverna de Platón- e acusou a Xunta de "derrotismo e incapacidade". Para tentar paliar esta situación, tanto BNG como PSdeG presentaron toda unha batería de iniciativas dedicadas a potenciar os sectores produtivos da comunidade, que foron definidos por Puy como un "conxunto de plans e informes". Fronte a isto, o deputado popular presentou varias propostas en relación co impulso de sectores estratéxicos da comunidade, así como á petición de "plena autonomía" para lexislar e executar políticas activas de emprego, co que deu por "probado" que, a diferenza do que asegura a oposición, a Xunta "si" ten política económica.

Os servizos sociais e o autogoberno foron os outros dous temas que marcaron o debate de política xeral. Rexeitar o financiamento público-privado para a posta en marcha de novas infraestruturas sanitarias e a posible implantación dun copago sanitario, reducir as listas de espera e conseguir unha maior transparencia nos datos e lograr unha maior atención ós dependentes foron as principais peticións dos grupos da oposición. Fronte a isto, os populares insistiron na proposta realizada por Feijóo no seu discurso: poñer en marcha unha Lei de garantías de prestación sanitaria, cuxo financiamento dependerá, non obstante, "de que o estado lle dea a Galicia 243 millóns do fondo de cooperación que esixe á Xunta". Deste xeito, os populares volveron ollar cara ó Estado, ó que lle piden que cumpra co financiamento fixado por lei para poder cumprir cos dependentes.

A necesidade "urxente" de reformar o Estatuto de Autonomía de Galicia foi formulado de forma intensa tanto polo BNG e PSdeG, que o ven fundamental para que o noso país gañe peso no conxunto do Estado. Tras o discurso "autonomista" e "galeguista" de Feijóo -tal e como o definiu o propio presidente-, o PP rexeitou esta petición, aprazando unha vez máis unha das materias pendentes da comunidade: lograr un maior autogoberno.
Fuente y autor: R. FERNÁNDEZ/Galicia hoxe