Ser moderno = BNG
O voceiro nacional do BNG, Guillerme Vázquez, advertiu de que o PPdeG "volverá mentir" na campaña electoral como fixo ata agora "masivamente", con cuestións como o concurso eólico do bipartito ou a aplicación da Lei de augas. Fronte ós populares, erixiu o Bloque como "única alternativa" e proclamou que esta formación é "imparable" , e como xa lles transmitira ós mozos no encontro da mañá, "o moderno é ser do BNG, que é falar, pensar, sentir e querer en galego".
"O noso éxito é o fracaso do PP", proclamou o líder nacionalista ante as 1.500 persoas -entre os que se atopaban os membros da Executiva e os deputados na Cámara galega- que conformaban o seu auditorio no Palacio de Congresos de Santiago, e do que saíron berros de "Non á guerra" á mantenta da intervención militar en Libia.
Tal e como indicou, "aquí está o BNG, ateigando esta sala e demostrando que hai alternativa, proxecto, hai solucións" e así se recolle nunhas listas que, tal e como apuntou, "están renovadas practicamente ó 50%". A todos estes candidatos e candidatas dirixiuse Guillerme para lles dicir "vós sodes a mellor demostración de que hai nazón, hai BNG, hai futuro".
Durante o seu discurso precedido de pequenas intervencións de 15 alcaldables, que o de Teo, Martiño Noriega, erixiu en "haikus", Guillerme Vázquez denunciou as "mentiras masivas" do PP e reclamoulle ó presidente da Xunta e ós populares galegos "propósito de emenda". "Por hixiene democrática, cesamento ós actores da campaña de difamación, ou se non, que se cese a el mesmo e así acabamos antes", proclamou dirixíndose a Feijóo.
Pola mañá, durante a súa intervención na convención electoral municipal que a formación frontista celebrou onte en Santiago, nun encontro con candidatos menores de 30 anos, Vázquez instou os mozos para sumar ó proxecto nacionalista, "Moderno é falar, sentir e querer en galego. Defender a paz fronte a guerras económicas. Estar en contra das centrais nucleares". Animando a mocidade a unirse para "construír concellos democráticos", para -afirmou- construír país e nación, Vázquez defendeu que "con xente nova incorporándose ás listas do BNG hai nazón e hai futuro".
Por iso, o líder nacionalista afirmou que o Bloque é "a única alternativa fronte ó PP" e os seus políticas de "dereitas" que "non resolven os problemas" da xente. No encontro tamén interviñeron candidatos ás municipais menores de 30 anos, Xurxo Rodríguez, rexedor de Castrelo de Miño; Raquel Jabares, tenente de alcalde de Culleredo; Óscar Ínsua, María Shantal e Anabel Gulías, entre outros.
Xa pola tarde, tras o saúdo de Xose Lois O Carrabouxo, tocoulles a quenda ós candidatos dos principais concellos. Baixo o lema "Coa túa forza hai futuro", presentáronse como a única alternativa ó PP, con "grandes perspectivas, con mentalidade gañadora e a por todas".
Twitter e Facebook botaron fume toda a xornada
As novas tecnoloxías foron as protagonistas na Convención municipal do BNG, na que dúas pantallas permitían visualizar os perfís en Facebook dos candidatos e, desde o inicio, a rede de ciberbloqueir@s púñase en marcha, para retransmitir a cita por Twitter e Facebook. Así, os membros deste colectivo introducían "tuiteos" e "post" comentando o que sucedía.
Segundo indicaron fontes dos nacionalistas, esta novidosa rede "tivo unha exitosa estrea", e aproximadamente un cento de internautas emitiron uns 2.000 tuiteos ou chíos durante todo o día, a maior parte durante a sesión de tarde, na que interviñeron os candidatos ás municipais e o portavoz nacional, Guillerme Vázquez.
Fuente: galicia hoxe
