Duro ataque de Feijóo a ZP na presentación dos 315 alcaldables do PPdeG

No outro extremo da península José Luis Rodrí­guez Zapatero toureaba onte o seu primeiro mitin logo de despexar o camiño da súa sucesión conminando ó Partido Popular a aproveitar a circunstancia para cesar nos ataques constantes ó presidente e dedicarse a elaborar un programa. Deste lado, nada máis lonxe da realidade. Núñez Feijóo, que onte se deixou arroupar polos seus 315 candidatos para a foto de familia, deixou claro que a marca ZP continuará sendo o maior activo nos ataques cos que os populares galegos queren aderezar as primeiras municipais ás que se enfronta ocupando a presidencia da Xunta.

Nun xesto inusual, Feijóo adiantouse onte cinco minutos ó horario previsto para a intervención ante os seus 315 apóstolos, co que conseguiu descolocar a algún dos periodistas que habitualmente os seguen e que xa se afixeron a que as roldas de prensa do Consello comecen sempre con atraso. Pero, lonxe de variar o rumbo ó que ten afeito ó seu pú­blico, tardou poucos minutos en converter a renuncia de Rodríguez Zapatero no novo torpedo á liña de flotación socialista.

As de onte eran as primeiras declaracións do líder dos populares galegos despois de que se coñecesen as intencións de Zapatero. Feijóo interpretou a noticia da véspera ante os seus candidatos como un xesto irresponsable do presidente que deixa ó país nunha situación de "provisionalidade" e cun Consello de Ministros convertido nun "casting de sucesores".

A reconversión da habitual andanada que Feijóo dedica ó presidente do Goberno en calquera das súas alocucións públicas levoulle a atcar ó PSOE por "desfacerse do seu pasado" contrapóndoo a un PP que onte se reunía no Multiusos de Sar para "construír o seu futuro".

Na arenga ós 315 candidatos do PP galego, Feijóo regodeouse na renuncia da véspera. "Por algo será", azuzó o presidente, que os socialistas se desfán" do seu máximo líder. O presidente do PPdeG non entrou a pedir as eleccións adiantadas que comezaron a reclamar os seus compañeiros de partido xa no minuto un pero cimentou a estratexia de Xénova asegurando que así Zapatero "deixará de ser un problema para o PSOE pero seguirá sendo un problema para o país".

O novo escenario polí­tico, no que a sucesión da cabeza visible do socialismo irrompeu con forza, non desvía ó PP de intentar converter ós seus adversarios en cómplices directos de Zapatero na vida municipal. Feijóo instou ós seus candidatos a buscar o "castigo nas urnas" a través dos seus sucesores, "dado que el non o quere recibir".

Do Yes, we can de Obama ó máis autóctono e proactivo Galicia quere. Este é o eslógan co que o PP galego animou onte ós seus candidatos a implicarse nun "cambio" nas municipais que Feijóo quere converter en precursoras da chegada de Mariano Rajoy á Moncloa. A consigna que trasladou onte ós seus candidatos a piques de comezar a carreira polos bastóns municipais pasa por deixar en segundo lugar a vitoria para pór no primeiro "a obrigación de presentar o mellor programa para cada un dos concellos". Todo iso acompañado coas instrucións de austeridade coas que os populares terán que comulgar.l

Recorrente identificación dos bipartitos co gasto e as disputas

Tras insistir nos puntais do seu discurso político que identifica coa austeridade, o rigor e a xestión da conxuntura socioeconómica, Alberto Núñez Feijóo remarcou que "abonda xa de perder diñeiro e abonda xa de perder tempo", xa que "España perdeu todo o seu diñeiro pola nefasta política económica dos últimos anos".

En Galicia, a "perda" de tempo e diñeiro achacouna aos gobernos bipartitos -BNG e PSdeG- que asociou ao gasto en asesores e publicidade, ou ás "súas divisións e disputas". "Temos que ser parte da solución e non parte do problema", subliñou Núñez Feijóo, segundo dixo, "ante aqueles que se cren donos dos seus concellos e das súas cidades".

Nesta liña, afirmou que o PPdeG non gastará diñeiro "en beirarrúas" ou "soldos de altos cargos", que "non se teñen" para os parados, pensións ou hospitais. "Non prometamos imposibles, senón fagamos todo o posible", sinalou.

AS FRASES Alberto Núñez Feijóo

"O PSOE desfíxose de Zapatero porque os socialistas cren que así xa non será un problema para o PSOE, pero o peor é que segue a ser un problema para España"

"Os concellos precisan de alcaldes que defendan os intereses do seu pobo, non as indefendibles actuacións do Goberno; que pelexen por un pobo con máis oportunidades, non co seu socio"
MONTSE CASTRO /Galicia hoxe