Máis adelgazamento
O plan posto en marcha polo Executivo de Feijóo para eliminar a administración paralela da Xunta de Galicia leva emparellada unha importante destrución de emprego público. Ata febreiro, os despedimentos alcanzaban a 411 traballadores con contratos de tipo temporal, segundo recoñeceu a Consellería de Presidencia. Pero sindicatos como UXT afirman que a administración galega contempla que ó final deste proceso a cifra chegue ós 1.000 traballadores.
Hai un ano a Xunta anunciaba o seu plan de racionalización de organismos dependentes do Goberno galego, os coñecidos como "chiringuitos". A rede contaba con 146 organismos e a Xunta analizara con lupa un total de 64 co obxectivo de evitar duplicidades e gañar eficiencia. O plan optaba por extinguir 42 entes instrumentais e por manter 16. O resto seguiría funcionando pero integraríanse noutros entes xa existentes. Segundo afirmou onte Francisco Núñez, responsable de Función Pública de UXT, a extinción destes 42 organismos leva parello o recorte dos mil empregados que traballaban neles con contratos temporais. Os fixos manterán o seu emprego, pero pasarán a ter praza na Xunta de Galicia.
Unha vez que conclúa a extinción e integración do primeiro lote de 64 organismos, o Executivo de Feijóo pensa analizar tamén os 82 entes que aínda non se examinaron. No caso de que se aproben novas extincións, algúns traballadores temporais poderían tamén perder os seus postos de traballo.
Segundo UXT, ata 4.500 persoas poden chegar a traballar en toda a rede paralela da Xunta. Esta cifra, matiza Francisco Núñez, alcanzaríase no verán cando o total dos empregados en extinción de incendios están contratados por Seaga. Núñez asegura que o persoal fixo dos "chiringuitos" non é moi alto e alcanza a unhas 200 persoas. O sindicalista asegura que, segundo os seus datos, 47 delas traballaban nos 41 entes que o Goberno de Feijóo xa extinguiu.
UXT afirma que mira o plan de racionalización da administración paralela con escepticismo. "Non estamos de acordo coa destrución de emprego, pero si coa racionalización da administración", afirma.
Ademais, os recortes nas nóminas de persoal debido á crise parece que están chegando tamén ás diferentes administracións públicas. As últimas cifras oficiais así o evidencian.
En xaneiro de 2008 os empregos públicos rexistrados na nosa comunidade ascendían a un total de 151.157, unha cifra que un ano despois se elevaba a 154.995. Nesa liña de progresión, entre xullo de 2009 e xaneiro de 2010, Galicia sumaba 5.420 novos traballadores públicos, co que o continxente de persoal ó servizo das diferentes administracións se situaba en 159.000. Pero botouse o freo no segundo semestre do ano pasado, e a nómina de empregados públicos en Galicia caeu de 159.000 a 154.097, adelgazando en case 5.000 efectivos.
O SERGAS ASINA O PACTO DE CONTRATACIÓN
A conselleira de Sanidade, Pilar Farjas, asinou onte cos representantes sindicais o Pacto sobre selección de persoal estatutario temporal no ámbito do Sergas e entidades públicas adscritas a este departamento, que permitirá unha "xestión máis áxil, transparente e eficiente" da contratación temporal do Servizo Galego de Saúde. Os obxectivos principais deste documento céntranse, segundo recorda o Sergas, na simplificación do procedementos, introducindo maior axilidade na fase de elaboración das listas e xestión dos chamamentos; e a unificación dos criterios de selección de persoal fixo e temporal.
FALA A PATRONAL
Alvariño pide recortes tamén na administración
O presidente da Confederación de Empresarios de Pontevedra (CEP), José Manuel Fernández Alvariño, reiterou onte a necesidade de acometer unha "reforma laboral profunda" nun momento en que o país está a vivir unha "clara desafección política". "Os políticos non namoran", abundou Fernández Alvariño nunha roda de prensa na que fixo fincapé en que o empresariado non vai "renunciar" a unha reforma que "non é cuestión de saír nunha fotografía", senón de abordar a regulación dos convenios colectivos e a "produtividade, non empresarial senón persoal, que é a que leva consigo a continuidade da empresa".
O presidente da patronal pontevedresa destacou tamén que os empresarios "adelgazaron" as súas empresas, reformadas en clave de "austeridade total", polo que lles esixen ás distintas administracións ese "mesmo adelgazamento". Por iso, considerou que chegou o momento de "abrir o debate" respecto da existencia de 315 concellos en Galicia. Ademais, anunciou tamén a súa intención de reunirse coas agrupacións comarcais dos sindicatos para pedir unidade.
Fuente y autor: N. SEQUEIRO/A. ARNÁIZ /Galicia hoxe
