O banco NCG elevará o crédito un % anual

Como caixa pura ou dona dun banco, Novacaixagalicia ten claro cal é o seu papel como financeira: apoiar durante o próximo lustro a economía produtiva au­amentando para iso o cau­dal do crédito. Este é un dos compromisos que figuran no plan detalla­do de recapitalización que aprobou onte o seu consello de administración e que se enviou ó Banco de España e á comisión do FROB.

Un día clave, pois culmi­naba o prazo outorgado polo gobernador da máxi­ma autoridade financeira, Miguel Ángel Fernández Ordóñez. Así o aseguraba á súa saída da cita da cúpula da caixa en Vigo o seu copresidente Julio Fernán­dez Gayoso, que espera que o Banco de España lle dea res­posta ó seu proxecto -que completa o remitido o pa­sado día 14- "a mediados de maio" e que, tras cum­prir "unha serie de trámites administrativos", incluída a transferencia en agosto do negocio da caixa, fun­cione xa en setembro.

A entidade achegaba onte nun comunicado unha pro­xección da evolución do seu negocio ata 2015. Neste prazo envorcarase no crecemento nos créditos dirixidos a pemes e fami­lias, cunha media anual en torno ó 6%, así como un avance medio anual en depósitos próximo ó 4%. Ó mesmo tempo reducirán de forma paulatina a mo­rosidade neste lustro.

Novacaixagalicia conti­nuará tamén coas políti­cas iniciadas de reducir os custos de explotación -sen detallar se haberá un maior recorte de persoal-, di­minuír a dependencia do financiamento maiorista e a exposición ó sector in­mobiliario. O seu saneamen­to basearase "na máxima prudencia" e en "realizar desinvestimentos para forta­lecer os recursos propios e xerar liquidez".

Este proxecto 2.0 "acele­ra as sinerxías da fusión e melloras de xestión". Pre­vé mellorar o seu cociente de efi­ciencia "en máis dun 5% anual ata 2015 e situala por baixo do 50%". Este plan "multiplicará por tres a rendibilidade actual de NCG, ata situar a rendi­bilidade sobre recursos pro­pios -ROE nas súas siglas en inglés- sobre o 10%".

A entidade ten claro que tras o desenvolvemento deste plan, contará "cun dos maiores cocientes de solvencia do sistema finan­ceiro internacional, cun capital principal por enriba do 10%". Os 3.008 millóns de euros dedicados a blindarse de posibles impa­gamentos sitúana, xa de por si, entre as financeiras espa­ñolas máis saneadas.

Ademais do seu plan de ne­gocio a cinco anos vista, na documentación detallada enviada ó regulador e ós futuros socios do Fondo de Reestruturación Ordena­da Bancaria (FROB) figura a es­tratexia de recapitalización posta en marcha e o ca­lendario de constitución do seu banco como vía que faci­lite a entrada de capital de terceiros. O Ministerio de Economía tramita a ficha bancaria dunha entidade que, ó ditado do bo go­berno corporativo, terá unha xunta de accionistas e un consello de administra­ción de 15 membros. Posibles socios hai unha longa lista. A entidade pro­mételle a MAFO e ó FROB seguir co seu programa de captación de investidores estratéxicos privados. In­formou que mantiveron "reunións con máis de 25 grupos de investidores interesados no ­futuro banco de Novacaixa­galicia". A caixa iniciará agora a segunda rolda de contactos para "selec­cionar as mellores ofertas e incorporar algo máis do 20% do capital procedente de investidores privados e institucionais". Non en­trará calquera, e menos especuladores: na selec­ción de aliados "valórase a súa experiencia no sector, o interese demostrado no pasado polas caixas, a súa ca­pacidade financeira" e a im­presión, o feeling ou retorno recibido nas conversacións mantidas.

A iso súmase a estra­texia de recapitalización interna, orgánica, para re­ducir os requirimentos de capital actuais. Xa está en marcha e podería reducir nuns 650 millóns a ne­cesidade de fondos a pedirlle ó FROB, que parte de 2.622 millóns. Se ademais os fu­turos socios depositan unha contía similar, para chegar ó core capital do 10% de­mandaríanse menos de 1.500 millóns. Canto menos, mellor, porque logo haberá que recomprarlle a súa parte.

A receita de futuro inclúe animar os galegos a comprar accións de Novacaixagalicia. "É o que hai que facer", instou onte Julio Fernández Gayoso, ó tempo en que foi rotundo en cualificar como "falsidade absoluta" unha posible operación co Banco Popular.

O conselleiro José Luis Veiga Lage explicou que os plans pasan por reducir en ó redor de 500 millóns de euros as necesidades de capital da entidade galega.

O Pastor reduce beneficios nun 19,5% pero interésase por sucursais das caixas

Os efectos da crise se­guen pesando nos resul­tados do Banco Pastor, que no primeiro trimestre do ano logrou un beneficio de 27,8 millóns de euros, un 19,4% inferior ó do arran­que do ano pasado. Con todo, o seu conselleiro de­legado, Jorge Gost, destacou un "cambio de tendencia" con melloras de marxes fronte ó último trimestre de 2010 que podería levar a entidade "cara a un cre­cemento plano" das ga­nancias este exercicio. A evolución na mar­xe apóiase no "crecemento dos depósitos en torno ó 5%" e á mellora rexistrada na cota de mercado, que considerou "moi signifi­cativa" -ata 15.740 millóns- e no investimento, pois os 21.522 millóns de cré­ditos a clientes implican un crecemento do 4,7%. O seu capital principal as­cendeu ó 9,91% e a morosi­dade medrou ata o 5,54%. Desde o Pastor insistían en que mantiveron contactos con Novacaixagalicia para adquirir algunhas oficinas urbanas da caixa. "Manifestamos que hai inte­rese e seguímolo manifes­tando", asegurou Gost.
Fuente y autur: SANTI RIVEIRO /Galicia hoxe