Un decreto feble
Despois de xestións maratonianas e mil e unha reunións da Interprofesional Láctea, o Goberno cumpriu coa súa palabra e deulle onte o visto e prace no Consello de Ministros ó Real Decreto que establece a obriga de usar contratos escritos homologados en todas as transaccións de leite cru entre produtores e industria, unha medida que comezará a aplicarse cando entre en vigor o novo regulamento comunitario "nos vindeiros meses", e que responde ás demandas do sector gandeiro, sobre todo o galego, clave nas xestións, pero que "aínda demanda máis achegas" ó documento.
Segundo informou o Executivo central, o acordo deberá incluír tanto o volume como o calendario de recollida e o prezo do leite, co fin de que sexan coñecidos polos gandeiros antes da recollida do produto. O texto normativo recolle como se aplicará en España a contratación no marco do novo regulamento comunitario que será aprobado nos próximos meses e co que se atende a demanda posta de manifesto durante os debates do Grupo de Alto nivel do Sector Lácteo de elaborar a lexislación necesaria para fomentar o uso de contratos no sector, como elemento de maior estabilidade.
A ministra véo como unha ferramenta moi útil
Ó respecto, a ministra de Medio Ambiente, Rural e Mariño (MARM), Rosa Aguilar, destacou que "este decreto, xunto cos regulamentos da UE, vai ser unha ferramenta extraordinariamente útil para darlles respostas ás necesidades e a realidade que vive o sector".
Por outra banda, a posibilidade establecida na nova norma de que unha organización de produtores poida negociar en nome dos seus socios todos os termos dun contrato coa industria, "é totalmente novidosa no ordenamento xurídico español e constitúe unha importante oportunidade para os gandeiros de mellorar a súa posición na cadea de valor do leite".
En Galicia, a pesar de que valoran "este paso adiante positivo", aínda ven "máis sombras ca luces" de cara ó sector produtor. Desde Xóvenes Agricultores (XXAA), o seu secretario xeral, Francisco Bello, considera que "establecer a contractualidade é uha reivindicación á que se lle dá resposta, pero aínda quedan flocos importantes en materia de prezos e dúbidas sobre a actitude de Competencia", e lamentou que os gandeiros galegos sigan a cobrar "moi por debaixo da media", ante o que "algunha industria xa ameazou con non aplicar as subas que na situación actual do mercado permita no sector lácteo".
Convocar as mesas, materia pendente da Xunta
Pola súa parte, Unións Agrarias (UUAA) tamén critica o papel xogado polo Tribunal da Competencia, que cuestiona a legalidade do texto, e o seu secretario xeral, Roberto García, reclámalle ó Goberno central "que lle poña fin a estes discursos e actitudes nocivas". Ademais, esíxelle á Xunta "axilidade e eficiencia na execución do Decreto", e lémbralle a Medio Rural que aínda ten pendiente de convocar a Mesa do leite e de constituír a da gandeiría, "na que é vital que se analicen os incrementos brutais dos custos de produción e se aborde en profundidade a situación dos sectores cárnico e lácteo".
Se ben XXAA e UUAA sempre estiveron presentes na Interprofesinal Láctea e apoiaron os postulados do Decreto, o Sindicato Labrego Galego (SLG) sempre estivo en contra "por impedir a negociación colectiva dos prezos". Segundo a súa secretaria xeral, Carme Freire, o texto "é un atentado contra o sector produtor, porque obrigará a asinar contratos por debaixo dos custos de produción, ademais de privatizar o control". "Este Decreto esíxenos que contratemos a nosa produción de leite coas industrias, é dicir, as explotacións terán que asonar os contratos aínda que os prezos marcados non nos cubran", censura desde o SLG.
Deleite e Muu cumpren un ano
A empresa lucense de base cooperativa Alimentos Lácteos celebrou onte o primeiro aniversario da súa constitución, tras a unión de oito cooperativas gandeiras galegas para adquirir a factoría de Pascual en Outeiro de Rei (Lugo). O obxectivo da súa creación era envasar o leite procedente das súas explotacións "eliminando custos de intermediarios", e lanzou ó mercado as marcas Deleite e Muu.
O xulgado pontevedrés, incompetente sobre Clesa
O Xulgado do Mercantil número 2 de Pontevedra non admitiu a trámite a solicitude de concurso voluntario de acredores solicitado por Clesa por "falta de competencia territorial", aínda que noutro auto si concedeu as medidas preventivas solicitadas pola dirección da empresa e requiriulles ás compañías eléctricas correspondentes que manteñan a subministración de enerxía na planta de Caldas de Reis (Pontevedra), a fábrica de Madrid e o centro de traballo de Bascones del Agua (Burgos).
Nun auto con data do venres, a maxistrada Paula Araujo López sinala que remitirá o expediente sobre o concurso solicitado por Clesa ós xulgados do mercantil de Madrid, que son os competentes nesta materia porque "o centro de intereses principais" da empresa está nesa provincia e non en Caldas de Reis.
Ó respecto, argumenta que "todo o relativo á súa actividade atopaen Madrid", cuestión que puxo de manifesto o Ministerio Fiscal, que tamén se pronunciou a favor da competencia dos xulgados do mercantil madrileños.
Así, a maxistrada sinala que "a única conexión" co xulgado de Pontevedra é a planta de Caldas, que conta con 160 traballadores pero, "ó longo de todo o territorio nacional", a empresa dispón de máis centros de traballo con máis de 800 empregados en total, mentres que o o seu domicilio social e "todo o relativo á súa actividade" se atopan en Madrid. Por iso, a xuíza de Pontevedra empraza a Clesa a comparecer na capital.
AS FRASESFrancisco Bello (XXAA)
"Establecer a contractualidade é uha reivindicación á que se lle dá resposta, pero aínda quedan flocos importantes en materia de prezos e dúbidas sobre Competencia"
Roberto García (UUAA)
"Cómpre demandarlle á Xunta axilidade e eficiencia na execución do Decreto, e é vital que se analice na Mesa do leite os incrementos brutais dos custos de produción"
Carme Freire (SLG)
"É un atentado contra o sector produtor, porque obrigará a asinar contratos por debaixo dos custos de produción, ademais de privatizar o control"
Fuente y autor: M. RODRÍGUEZ /galicia hoxe
