As enquisas motivan máis ó pp e constatan o temor da esquerda

O secretario xeral do PP galego, Alfonso Rueda, asegurou que as enquisas publicadas a fin de semana por distintos medios de comunicación, nas que aseguran que os populares estarían a menos dun concelleiro de lograr a maioría absoluta nas principais cidades galegas invitan os populares a ser "francamente optimistas, pero tamén moi, moi cautelosos". As sondaxes danlle boas expectativas á dereita e confirman o temor da esquerda, que admite que é probable que o PP poida gobernar e cambiar a cor política das urbes.

"Quen dea por gañadas as eleccións, probablemente estará a dar o primeiro paso para perdelas e nin o PPdeG nin ningún dos seus candidatos caerá nesa formulación", sentenciou Rueda onte. Ó respecto, nunha rolda de prensa celebrada na sede rexional do partido, Rueda admitiu que a campaña está a ser "moi disputada", e manifestou a intención do PP de traballar para que non se volva repetir o sucedido nos comicios de 2007, cando os seus candidatos quedaron en varios municipios "a moi poucos votos" da maioría absoluta que, alertou, supón "que os perdedores se xunten e non poida gobernar o que gaña. Traballaremos para que iso non suceda", insistiu Rueda, quen subliñou que as enquisas "en xeral" constatan un dato "moi revelador", con referencia a que os bipartitos de PSOE e BNG "baixan en apoios electorais na práctica totalidade dos casos". "Iso coincide coas nosas enquisas e estou seguro que tamén coas que manexan internamente PSOE e BNG", manifestou o dirixente popular.

Dito isto, recordou que, nas enquisas de 2007, se colocaba os candidatos do PPdeG "en moitos casos lonxe de obter as alcaldías e mesmo de ser a lista máis votada" e que as devanditas previsións non coincidiron cos resultados que lles outorgaron as urnas, como tampouco apuntaban as sondaxes demoscópicos de 2009 que o seu xefe de filas, Alberto Núñez Feijóo, gañaría por maioría absoluta, o que finalmente sucedeu.

Agora, Rueda resaltou que as enquisas sitúan ao PPdeG "a moi poucos votos" de obter os gobernos "en oito dos dez" municipios máis poboados de Galicia, extremo que os populares non están dispostos a desaproveitar. Por iso, insistiu en que a formación popular tomará esta enquisa como "unha motivación e unha indicación de que hai que seguir traballando e moito" durante os días que faltan para cita coas urnas. "Hai que converter o feito claro da vitoria, de ser a lista máis votada, en maiorías absolutas que nos permitan gobernar," chamou Rueda, quen insistiu en que os seus manterán a liña "de propostas" coa que arrancaron a campaña electoral e non entrarán a responder "ás descualificacións, insultos e saídas de ton" dos que ven "que o seu electorado se sente defraudado e se desmolibiza", con alusión a PSOE e BNG.

O chamamento: Que cada asistente logre 20 votos

O PPdeG celebrou onte un dos seus actos máis grandes en Vigo, a onde se trasladou Alberto Núñez Feijóo ó mediodía para participar nun xantar-mitin. Nel, o líder galego fixo unha clara chamada á mobilización para intentar selar a maioría absoluta nas urnas o vindeiro domingo, consciente de que as sondaxes publicadas en distintos medios revelan que a roza nas principais cidades, pero tamén de que un resultado peor podería supor outros catro anos de poder en mans de coalicións formadas por PSOE e BNG, tan demonizadas nos seus mitins.

"Agora, Corina, dinche que che falta medio concelleiro e ímolo conseguir entre todos", continuou o líder popular, chamando á mobilización, como fixeron nas súas respectivas intervencións a propia candidata popular e o presidente do PP de Pontevedra, Rafael Louzán, encargado de arrincar un mitin no que "cambio" foi unha das palabras máis repetidas. Na mesma idea incidía o folleto co que se atoparon cada un dos asistentes ó acto no Ifevi vigués, no que se lles animaba a chamar "20 persoas" para pedirlles "que voten a Corina". "Se todos facémolo, conseguiremos o cambio. Depende de ti", concluía o panfleto, depositado sobre cada un dos pratos.

De acordo co concepto de comida mitin, os discursos foron breves, e os asistentes puideron empezar a gozar antes das 15.30 horas dun tradicional menú galego, no que non faltou o polbo e a empanada. De sobremesa, tocou roscón con foto de Corina Porro incluída e todo iso polo módico prezo de 15 euros.
Fuente: Galicia hoxe