Bipartitos vs PP

No ecuador da lexislatura autonómica e á porta das eleccións municipais, a avaliación dende os concellos sobre o traballo da Xunta varía coa cor política. Alcaldes do PP eloxian a xestión do presidente galego, Alberto Núñez Feijóo, mentres que os rexedores de PSdeG e BNG lle esixen "máis lealdade institucional" e esperan que empece a gobernar despois do 22-M. Esta última idea é compartida polos rexedores das principais cidades galegas, así como a percepción de que a xestión de Feijóo "non existe". En ningunha delas goberna o PP, seis teñen un alcalde do PSOE e unha do BNG. Segundo opinións recabadas por Europa Press ós rexedores das urbes, todos inciden na escaseza de proxectos apoiados polo goberno autonómico nos concellos e aseguran que os que se levan a cabo proveñen do Executivo anterior bipartito.

Á hora de outorgarlle unha nota á xestión de Feijóo, todos lle conceden un suspenso. O rexedor de Ferrol, por exemplo, o socialista Vicente Irisarri, ponlle un 2,5 de nota, coa esperanza de que mellore e poida "sacar un 7,5 en setembro". O nacionalista pontevedrés Fernández Lores cualifícao cun "suspenso con poucos visos de recuperación" e pide que deixe de usar a Xunta como "elemento do aparato do PP".

No lado oposto, e xa en concellos máis pequenos gobernados polo PP, a valoración cambia radical. O rexedor de Baiona, Jesús Vázquez Almuiña, outórgalle un oito a Feijóo e o homólogo de Quiroga lánzase ó dez.

O PPdeG confía en cambiar a cor política das urbes o 22-M, valéndose do efecto que ten nas municipais o goberno da Xunta de quenda. O secretario xeral Alfonso Rueda augura que a súa formación "gañará" nas sete grandes cidades e ve posibilidades de maioría absoluta en catro delas. Socialistas e nacionalistas, despois de perder as autonómicas no 2009, farán todo o posible por aguantar os gobernos de esquerdas municipais nas cidades atacando na campaña electoral, precisamente, á xestión Feijóo.

Abel Caballero

"A xestión de Alberto Núñez Feijóo non existe. O Goberno galego non se estreou en Vigo nin impulsou ningún proxecto no que tivera que achegar fondos propios"

Xosé Sánchez Bugallo

"Débese rebaixar a tensión entre o Executivo autonómico e as corporacións locais e esforzarnos na despolitización das relacións institucionais"

José Crespo

"A Xunta mantivo estes dous anos o apoio aos concellos, a diferenza do Estado. A crise nótase e non se pode comparar coa época de Fraga"

Javier Losada

"A miña relación con Feijóo é cordial, aínda que non podo avaliar a súa xestión xa que non vin ningún proxecto novo. O único que fixo foi executar o que lle deixou o bipartito"

Vicente Irisarri

"A nivel humano, o trato con Feijóo é cortés. A cidade tendeulle a man, pero os resultados prácticos foron un fracaso en infraestruturas, servizos sociais e emprego"

Gerardo Criado

"Foi extraordinario o cambio rexistrado na relación coa Xunta con respecto ó Bipartito. Outórgolle a Feijóo un 8 de nota, próximo ó sobresaliente"

Francisco Rodríguez

"O Executivo de Feijóo é o da falta de competencias. Só foi eficiente en desmantelar a actuación do Goberno anterior. O balance en Ourense é cero"

Miguel A. Fdez. Lores

"A Xunta está desaparecida durante a crise e, en vez de facer o seu traballo, dedícase a botarlles a culpa aos demais. En Pontevedra, paralizan os proxectos importantes"

Juan M. Jiménez Morán

"A relación da Xunta co concello e a súa aposta polos proxectos da localidade é inmellorable. O Bipartito poñía todas as pedras no camiño"

Xosé López Orozco

"A Xunta ten pendentes importantes compromisos con Lugo, en materia de infraestruturas e en relación á conservación da muralla romana, icona cultural da cidade"

Martiño Noriega

"As relacións coa Xunta foron correctas nas actuacións nas que non tiña que achegar fondos. Hai un uso partidista, agardo que cambie e desbloquee actuacións"

Susana Vázquez

"A miña nota para Feijóo é un dez. Desde que está na Xunta, os alcaldes somos recibidos e tratamos co respecto que merecemos"
Fuente Galicia hoxe