A Xunta rebaixou en dous anos un 61% as axudas aos libros de texto en galego

A Secretaría Xeral de Política Lingüística, dirixida por Anxo Lorenzo, publicou o venres da semana pasada a orde pola cal quedaba "sen efecto" a convocatoria de axudas á edición en lingua galega de recursos didácticos curriculares para niveis non universitarios. É dicir os libros de texto. As editoriais vían con esa orde como 400.000 euros que estaban destinados a cumprir co publicado na citada convocatoria desaparecían despois de meses agardando por unha resolución que, polo momento, parece que non vai chegar. "É un día no que custa manterse sereo", sinalaba en Xornal.com Manuel Bragado, presidente da Asociación Galega de Editores. Por vez primeira, a Xunta suspendía estas axudas.

Non obstante, as editorias viron xa como, dende que o PP chegou á Xunta, as contías destas axudas non facían máis que minguar. Os recortes sufridos nesta partida era do 61%. No ano 2009 e gobernando aínda o bipartito, o 4 de febreiro publicábase no DOG a resolución que regulaban estas subvencións. As axudas ascendían até unha "contía máxima total de 1.050.000 euros". Era a mesma cantidade que en 2008. Non obstante, en 2010 e xa gobernando o Partido Popular, as mesmas subvencións para os libros de texto caían até os por unha contía máxima total de 501.617 euros. É dicir, os fondos sufrían un recorte de máis do 50% con respecto ao ano anterior. Ademais, na resolución que se publicaba as axudas dese ano, incluíase unha cláusula polo que se podería reducir aínda máis. "Sen prexuízo de ulteriores variacións producidas como consecuencia de modificacións orzamentarias", explícabase no DOG.

Este ano, o 1 de marzo aparecía no DOG a orde pola cal se convocaban as axudas á edición de libros de texto en galego. A contía seguía baixando e situábase nos 400.000 euros e incluíase a cláusula que xa advertía, como o ano pasado, do que podía acontecer: "Sen prexuízo de ulteriores variacións producidas como consecuencia de modificacións orzamentarias". Producíronse finalmente "variacións" e a Xunta decidiu "deixar sen efecto" a convocatoria. Dos recortes do 61% en dous anos acabouse na suspensión total das axudas.

PROMOCIÓN LOCAL DO GALEGO

No caso das axudas para a promoción do galego nos distintos Concellos, as cifras tamén se foron reducindo. Tal e como explicou onte en Xornal.com Nel Vidal, presidente da Coordinadora de Traballadores de Normalización Lingüística (CTNL), as axudas en 2009 neste eido ascendía a 800.000 euros. Un ano despois, en 2010, a contía reduciuse a 602.668€, "sen prexuízo de ulteriores variacións producidas como consecuencia de modificacións orzamentarias". Finalmente, este ano 2011 a partia quedou reducida a 420.000 euros.
Fuente: Xornal de Galicia/ALBERTO RAMOS